Comenti sa traditzioni bolit, at essi sa SeuinStreetBand a oberri su festival in su mericeddu de cenarba su 24 de Mesi de Orgiolas, portendu musica e allirghia intru is orrugas de sa ‘idda, a innantis chi sa genti lompat in sa prassa de Santu Giuanni.

Sa matessi dì s’at amostai su spetaculu de tiatru “Brulla” de Franciscu Giomi e Mighela Atzeni. A pustis, in pissu de palcu, at essi Pàulu Angeli a fairi connosciri s’urtimu discu “Lema”. A serrai su merì ant essi is sperimentatzionis de is TUN – Torino Unlimited Noise, chi est su paris de tres piciocus chi si lamant Giuanni Denitto F,àbiu Giachino e Matia Barbieri, chi funt capassus de ponni paris jazz, improvisatzioni e s’eletronica.

Sabudu su 25, si cumentzat cun sa presentada de s’“Annuariu 2025” de “Sa Scena”, sa rivista chi de cuasi otu annus contat sa musica pesada in Sardigna. Is meris de domu ant essi Simoni La Croce e Claudiu Loi.

A sighiri, s’aperitivu cun musica at a acumpangiai sa genti cun is Space Rooster, progetu de is dus Massidda-Meledina. Is segus s’ant a fairi connosciri is Feruja, chi lompit de su Sulcis e acapiant blues, eletronica, ritmus mediterraneus e pensadas de s’Africa ocidentali.

Sa cica vocal-loop at a tenni comenti de protagonista “Mumucs”, su progetu de Marta Loddo, a innanti de lassai su palcu a su sassofonista Marcu Scipione, musicista chi at postu in campu unu trabbagliu originali intru de jazza, world music e sprimentatzioni.

Su merì de su 25 at acabbai cun is casteddaius “La Grasa de Pollo” chi funt su paris de cuatru musicistas, cun esperientzia manna, chi ant a presentai s’album “Mescalizaciòn”.

S’urtima dì, est a nai dominigu 26, si partit cun s’aperitivu “Mumucs”. In su merì eus a biri su spetaculu tiatrali “Una verissima storia del Jazz” de Pieru Franciscu Loche e Pàulu Fresu, trabbagliau de Insulae Lab, chi contat, intru de fueddus e musica su jazz in Sardigna in is annus Otanta. In pissu de palcu ant a bessiri, in prus de Loche, finas Giuanni Luca Tozzi e Pàulu Assiero Brà.

A serrai custa editzioni de degi de SeuinMusica ant essi Ilaria Porceddu cun Emanueli Contis chi presentant “Lumià” unu trabbagliu, bessiu de pagu, chi imbestit cantzonis, eletroniga e cinema.

 

In prus de totu custu s’ant a podiri bisitai sa mostra de fotografias “Degi annus de SeuinMusica” e totu s’erricu caminu museali de Seui. De cenarba a dominigu, in prus, in su Centru Polivalenti “Is Minadoris”, in via Torino, s’at agatai su studiu de tatuagius Crazy Cat, chi erricat sa manifestada.

Lompiu a s’editzioni de degi, duncas, SeuinMusica sighit a essiri non feti una rassigna musicali, ma unu logu de atobiu intru de artistas, sperimentzionis e connoscentzia de su territoriu, capassu de amostai su centru storicu de Seui comenti unu laboratoriu culturali obertu a musicistas, apassionaus e curiosus.

 

 

Foto: Mauritziu Pretta