Crescint is impestaus de Covid, prus de centucincuanta, e su sindigu de Sinnia, Tarcisiu Anedda, cun d’una oridinantzia cicat de ddus firmai. Finas a su 22 de austu, de is dexi de merì a is ses de mengianu, non s’ant a podiri leai de is market, tzilleris, piitzerias o ristorantis, peruna cosa de bufai, calechisiat sa gradatzioni.

Nudda de fairi finas po chini bolit bufai, de s’abba a sa birra, in si zona pubricas o abertas a sa genti, in denanti de is butegas, in is prassas, in is parcus e in is spiagias.

In is tzilleris, in is pitzerias e in is ristorantis, si podit bendiri sa cosa de bufai feti in sa panga o in si mesigeddas, in logu serrau o inlogu obertu non ddi fait nudda.

Abarrat s’obrigu de tenni sempiri sa mascherina po su nasu e sa buca a intru de is aposentus e in foras chi non si podit abarrai a sa stesiada de sa genti. Suspendius, in totu is logus e po totu sa dì, is atobius musicalis o de ballu, culturalis, de tiatru e sportivus. Podint sighiri is campus po pipius feti chi si podint poderai is regulas donadas de su sindigu. In is spiagias su stesiamentu de unu ombrelloni a s’atru depit essiri de dexi metrus.

In su mentris in Sardigna eriseru eus tentu cuatruxentus impestaus nous in pissu de 2.271 tamponis fatus. A dolu mannu tocat a chistionai de tres mortus puru: una femina de setantanoi annus in sa provincia de su Sud Sardigna e dus ominis, de setantacincu e setantaset’annus chi biviant in sa citadi metropolitana de Casteddu.

Unu in prus est intrau in sa terapia intensiva e imoi si ddue agatant in 23. Invecias in is atrus aposentus de is spidalis imoi funt in centubintotu, ca unu ndi est bessiu. Is incungiaus in domu funt 6.910, cincuantacuatru in prus de sa dì a innantis.

Est a nai ca is impestaus  nous  chi intrant in is spidalis funt ominis e feminas chi no ant fatu su vacinu e chi s’idadi media est abascendusì chena farta.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

Foto: https://ilrisvegliodellasardegna.it/la-bellezza-paziente-di-sinnai/