S’Italia torrat a partiri, su guvernu de Draghi si pigat un’erriscu e de lunis bintises de arbili cumentzat a torrai a sa normalidadi. Ristorantis, tiatrus, palestras, stabilimentus e fieras: totu a pagu a pagu finas a su mesi de triulas. Intru de is regulas at a serbiri finas unu lassapassai po andai de una regioni a un’atra. In custu documentu ddue depit essiri o su vacinu fatu, o airi fatu unu tamponi in is urtimas corantot’oras o massimamenti de essiri sanau de su Covid.
Custu decretu, annuntziau eris de su presidenti de su Consigliu e de su ministru Roberto Speranza at erribai in su Consiglio dei Ministri martis o giobia chi benit.
A torrai a oberri de lunis 26 ant essi a innantis de totu is ristorantis: obertus a prangiu e a cena ma feti po chini tenit logus in foras. Finas cinemas, tiatrus e spetaculus, ma chi non si prengiant in totu. Torrat a partiri su sport puru e cussus aunia ddu at cuntatu puru comenti su fubal piticu. Totu custas mesuras funt po is zonas grogas e arangiu.
Totu is scolas ant essi in presentzia, sempiri in zona groga e arangiu, e in cussa orrubia invecias finas a sa tertza media cun is scolas mannas dividias a metadi.
De su 15 de maiu podint torrai a oberri is piscinas e, novidadi manna, torrant a oberri is stadius, aunia ant a podiri intrai in milli. Duncas in is urtimas partidas de su campionau e Serie A ddu at eesi genti setzia a castiai e aici finas in is palatzetus. De arregodai, po non si sbagliai, ca funt sempiri mesuras po sa zona groga.
Ant a sighiri, in segus, is ristorantis a su serrau, is palestras e is fieras, is cungressus.
Imoi tocat a biri cantu regionis italianas ant a essiri grogas de su 26, cuasi de seguru intru de custas no ddu at essi sa Sardigna ca eriseru puru teniat su Rt prus artu de totu s’orrestu de s’Italia.
Po nosu at cumentzai totu su 3 de maiu?
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
