Letitzia Moratti si candidat po fairi sa Presidenti de sa Regioni in Lombardia. Ma su spantu est ca non ddu fait po su centrudrestra, aunia est sempiri stetia, ma po su “Terzo Polo” e sa lista civica chi est fraighendu de tempus. Ndi pesant unu muru cussus de su Partidu Democratigu chi declarant ca mai e poi mai dd’ant donai is votus e pedint a su partidu is primarias.
A oberri is ballus de sa chistioni est su capu de Atzione e totu in is matessis oras chi su Pd si fut atobiendu in Milanu. “Donai una manu a duas personis chi in Lombardia e in su Latzio ant fatu beni in sa campagna vacinali e in sa sanidadi comenti Alessiu D’Amato e Letitzia Moratti est su scioberu prus giustu chi su ‘Terzo Polo’ possat fairi”, at scritu Calenda. “Moratti no est un’impositzioni poita de is atobius chi eus fatu su nomini su nd’est bessiu a campu – is fueddus de su segretariu de su Partidu Democratigu de sa Lombardia Viniciu Peluffo – non creu chi possat funtzionai chi ci siat calencunu chi decidit finas po is atrus. Non boleus fairi de conca nosta ma nemancu cun sa conca de is atrus”. Nau ancora prus craramenti “Non dda eus sustenni”.
“Cumentzat un’atru caminu po donai arrespustas chi sa Lombardia minescit”, is fueddus de Letitzia Moratti. “Unu progetu forti chi at a donai atentzioni manna a is territorius – aciungit – chi est prontu a donai su meglius po su benidori de sa Lombardia e de s’Italia” e obertu “a personis de su tertzu setori e de is sotzius”.
In prus de su sustegnu de su “Terzo Polo”, Moratti at a podiri contai in pissu de una “rete civica”, tra custaas “Lombardia Migliore” sotziu postu in peis tra is atrus de su consiglieri regionali Manfredi Palmeri.
Abarrat de cumprendiri chi in sa lista ddu at essi postu po su sindigu beciu de Milanu Grabieli Albertini, chi Palmeri iat giai cicau po ghiai una lista civica.
Is giogus funt apenas cumentzaus, cantu ci scumiteus ca ndi eus a biri de bellas?
Màuru Mura
Martis, su otu de Sant’Andria de su 2022
Foto: https://www.ilfattoquotidiano.it/2022/11/03/lombardia-il-pd-chiude-a-letizia-moratti-sostegno-non-e-opzione/6860769/
