Si narat inchietu meda prus che delediu su presidenti de su Casteddu Tomasu Giulini, po custu campionau chi bit sa scuadra sua gherrendu po non ci calai in serie B.

Giulini, intendiu in Radiolina in sa trasmissioni “Il Cagliari in diretta”, at fueddau chena atacai nudda e fendu biri cantu est arrabiau. Est arrennegau su presidenti e iat bolli biri su matessi arrennegu in is giogadoris in sa partida de cras a merì cun su Parma. Est una de cussas partidas chi contant, est a nai ca su Casteddu cun is emilianus si giogat bona parti de su campionau. “Su tempus de is sbaglius est acabau – at nau Giulini – e sabudu depus intrai in campu cun gana de binciri sa partida, ca contat feti cussu. No eus perdiu ancora su speru de ce dda fairi, totus, deu, s’allenadori e is piciocus ci creeus, finas poita in is urtimas partidas eus bidu una reatzioni de sa scuadra. Po sighiri a ddue creiri tocata a binciri sabudu chena atras bideas. Depint essi is campioni chi teneus, e pensu a Godin, Nainggolan, Nandez, Pavoletti e Joao Pedro, a amostai sa stada po binciri a is prus giovunus”.

Unu disprageri tenit su presidenti prus de totus: “Cun totu s’arrespetu po Di Francesco, forsis ddu depia cambiai a innantis de sa partida perdia cun su Torinu e non a pustis”.

Po cussu chi at erribai in su benidori Giulini est craru: “Est dificili a tenni bideas chena sciri aunia at a giogai su Casteddu ocannu chi benit. Deu soi cunvintu in serie A, ma chi calaus in serie B eus a fairi de totu po ci torrai a bessiri cun meda de custus giogadoris chi ci funt imoi. Ma imoi – acabat Giulini – non bogliu prus intendiri fueddus de disisperu, depeus pensai a binciri sa partida de sabudu, contat feti custu!”.

Est una partida, cussa de cras, chi contat non feti po su Casteddu, ma finas po su Parma, chi est feti a dus puntus: de seguru chini perdit at a tenni unu pei in serie B.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22

 

 

 

Foto: https://forbes.it/2020/08/17/cosi-tommaso-giulini-ha-rilanciato-azienda-di-famiglia-e-cagliari-calcio/