Candu iant giogau giai noranta minutus sa partida dda fut bincendu, po 2-3, su Parma e su Casteddu teniat unu pei in serie B. Su disisperu de is tifosus si podiat ligiri in totu cussu chi ant scritu in is social, ma, a pustis, cun dus gol de Pereiro e Cerri, s’est passau de cussu disisperu a una allirghia chi non teniat acabu. Sa classifica si fut aconciada unu pagheddu e su Torinu de Davidi Nicola fut feti a dus puntus de is piciocus de Semplici. Su dominigu tocaiat a fairi is crobus e sa spera fut chi sa Roma bincessit in Torinu, est andada mali e, sa scuadra chi est stetia de Valentino Mazzola, at bortulau su gol de Mayoiral cun tres gol in su segundu tempus. Is puntus de diferentzia funt torraus a essiri cincu, ma tocat a ligiri beni sa classifica: imoi sa cursa de su Casteddu, comenti iaus giai nau de meda, a s’imbessi de cussu chi naraiant is atrus, si podit fairi intru de atras duas scuadras, sa Fiorentina e su Benevento. Custas duas scuadras tenint trinta puntus, che su Torinu e totu, chi a dogna manera tenit una partida de mancu. Sa nova manna est ca su Casteddu ddas depit atobiai in su mesi de maiu, una, sa Fiorentina, in Casteddu e s’atra in Benevento. Duncas nudda est perdiu, non serbit nudda a prangiri o incurpai is atras scuadras de non giogai beni, is tifosus depint imparai a tenni sa conca giusta! Tocat a erribai a cussas duas partidas cichendu de acurtziai custus cincu puntus e importanti meda parit, a custu riguardu, est sa partida de pusti cras cun s’Udinese: chi si bincit in Friuli su Casteddu ce dda fait, seus prontus a scumitiri. Tenit totu sa scuadra de Giulini po ci provai, is giogadoris de una partida comenti cussa de sabudu passau podint pigai cussa fiducia chi forsis est mancada in s’orrestu de su campionau. In Friuli si depit andai po binciri, ca giai si podit fairi.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22
Foto: https://www.youtube.com/watch?v=czTFlmLjHM8
