In su Guvernu est chistionendusì de sa possibilidadi de torrai a oberri is scolas, de totu s’Italia, feti su ses de arbili. Po imoi su decretu ministeriali narat de ddas serrai finas a sabudu chi benit.
“Eus scioberau de serrai e nosi eus pigau finas sa possibilidadi de torrai a fairi su decretu, tocat a biri comenti si ponint is cosas sa cida ch’intrat”, at nau su Presidenti de su Consigliu Superiori de sa Sanidadi Francu Locatelli.
Finas su presidenti de su Guvernu, Giusepu Conte at fatu sciri ca: “Eus a benni a biri, po s’ora non ddu sciu mancu deu eita eus a fairi. Depeus sempiri arregionai cun conca e proportzionalidadi”.
Is cosas de interessu, imoi, funt atras: su decretu economicu, prima de totu, ma finas cussu po is familias chi tenint problemas mannus cun sa serrada de is scolas.
Un’atru problema est cussu de is tribunalis, su ministru de sa Giustissia Alfonso Bonafede est pensendu de suspendiri totu is processus chi no apretant in cussus logus aunia ddu at emergentzia.
Is numurus de su Coronavirus, in su fratempus, funt sempiri crescendu: funt 3296 is malaidus, 590 in prus in d’una dì feti; 149 funt is mortus, 42 in prus de mercuris.
Foto: https://www.informazionesenzafiltro.it/scuole-chiuse-per-coronavirus-ma-i-genitori-a-casa-chi-li-paga/
