Iat pediu una reatzioni Cladiu Ranieri, finas forti, in custas otu dis a pustis is cuatru partidas perdias de sighiu cun su Frosinone, su Torinu, sa Roma e sa Lazio, e calencuna cosa dd’at tenta. “Nosi pigaus unu puntu bonu meda e torraus a partiri”, narat s’allenadori romanu, in segus de sa partida de custu mericeddu in Udine. Est acabbada po 1-1, ma su Casteddu si dd’at giogada cun barra e gana e at erriscau de binciri.
“Fustis pigaus mali, nosi seus torraus a pigai duas o tres partidas e a pustis un’atra bia mali meda. Scieus de su cumentzu ca est unu campionau dificili meda, ma custus piciocus funt barrosus e non bolint mollai mancu po nudda. No at essi facili, ma de seguru ci eus a provai finas a s’urtimu. Po comenti trabaglianta intru de cida mi donant spera manna chi finas deu dongiu a issus: s’est amostada sa fidi e sa gana de bolliri abarrai in serie A. Mi carrigant e deu carrigu a issus”.
Sa cida chi benit, in sa Domus Unipol de Caseddu, atra partida de importu cun su Napoli. Curiosu meda ca is dus allenadoris, Mazzarri e Ranieri, si funt setzius in is matessis panchinas: “At essi una partida dificili meda, contras de una scuadra, non si ddu depeus scaresciri, chi est gioghendusì sa Champions League e ocannu passau at bintu su scudetu cun miniscimentus mannus. Nosi poneus a trabaglia po cicai de donai totu cussu chi teneus aitru”, aciungit Ranieri.
Ranieri bolit chi su Casteddu sigat su caminu chi tenit in conca, a pustis custu puntu de oru: “Custu dominigu nosi lompit unu puntu, da poi de cussas cuatru partidas maladitas. Fut in sa norma chi is piciocus timiant, ma in segus de su gol si dd’ant giogada beni. Candu fustis 1-1 seus andaus acanta de dda binciri. Lastima! Naraus ca s’Udinese at giogau beni in sa parti de unu e nosu in cussa de dus”.
Ancora est Gaetano, a pustis su gol de sabudu passau cun sa Latzio, a agiudai is cumpangius cun dd’unu atru bellu gol de conca: “Su piciocu at tentu fortza e si dda est gioghendu beni. Comenti de Mina, ca in difesa ponit esperientzia e malesa. Nosi serbiat unu piciocu de aici”.
Màuru Mura
Dominigu, su digiotu de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=z-Tg_21k49s
