Atrus tres apestaus de su Coronavirus in Sardigna, in Casteddu custa borta, e imoi in s’Isula nosta funt corantadus is malaidus. In custas oras s’est chistionau, massimamenti, de su casu de s’ispidali santu Franciscu de Nugoro cun seigi, dotoris e infermieris, in cuarantena de una bona pariga de dis e atra genti in isolamentu. Totu sa genti chi trabagliat inigui at pediu de fairi is esamis: centubinti is tamponis fatus. De is primus trinta, bintotu funt negativus e dus tocat a ddus torrai a fairi ca ddu at calencuna duda.
Po cicai de fairi calencuna cosa sa regioni at aprontau unu pianu de crisi chi bidi una spetzia de divisioni de su territoriu in duas partis: cussa de nord e cussa de sud. Feti un’aeroportu abarrat obertu, cussu de Su Masu, de oi serrant cussu de Salighera e cussu de Terranoa.
Sucedit cussu chi est sucediu in totu is atras regionis italianas, feti un’aeroportu obertu, in dogna regioni e duncas cun Casteddu funt obertus Ancona, Bari, Bologna, Catania, Genova, Lamezia Terme, Lampedusa, Milano Malpensa, Napoli Capodichino, Palermo, Pantelleria, Pescara, Pisa, Roma Fiumicino, Torino, Venezia Tessera e Roma Ciampino feti po is aereus de Stadu, canadair e emergentzias.
Foto: https://it.wikipedia.org/wiki/Aeroporto_di_Cagliari-Elmas
