De oi totu is regionis italianas, duncas fintzas sa Sardigna, torrant in zona arva, ma tra una pariga de dis, est a nai su 31 de custu mesi, a pustis dus annus non c’at essi prus sa cunditzioni de emergentzia in relata a sa pesta e a is obrigus de sa mascherina cun su “Super Green Pass”, ma is mascherinas ant essiancora obrigu in is logus serraus.

In Sardigna, a dogna manera, sighint a si preniri is spidalis: in is aposentus normalis funt su 20%, S’abasciat a su 9% de is letus ocupaus in is terapias intensivas.

In prus de su mudamentu de is coloris, cambiant finas is regulas po sa scola: in Dad ant andai feti is impestaus, chi non si giumpant is cuatru in dogna classi. S’at a fairi sa letzioni in presentzia ma totu ant a depiri tenni in faci sa mascherina Ffp2 po dexi dis (a innantis fut obrigu feti cussa chirurgica). Is piciocus ant a podiri torrai a fairi is gitas e is professoris e maistus, finas chena vacinu, ant a podiri torrai a iscola, ma chena podiri fairi letzioni.

S’obrigu de su vacinu abarrat finas a pustis s ucuindixi de làmpadas, feti po chini trabagliat in is spidalis e in is Rsa.

A dì de oi in Sardigna is vacinaus, sonumancu duas bortas, funt 1.357.598, chi bolit nai in percentuali su 84,9 de totu sa genti chi bivit in s’Isula. Est a nai puru ca in is urtimas cidas funt abasciadas is vacinatzionis, massimamenti intru de cussas de is pipius, frimas a pagu de mancu de su 45%: in totu sa vacinatzioni de unu est passada de calencuna centinaia a calencuna dexina, e in su fratempus sighint is vacinatzionis de tres. Si stesiat fintzas s’obietivu chi pariat a portada de manu: sighendu aici a giumpai su 90% de sa popolatzioni si nd’at chistionai non prima de su 2024.

Scriant, candu fustis incungiaus in domu, ca ndi bessiaus meglius. No est sussediu de seguru, seus ogualis e peus puru.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.metropolitano.it/covid-dall1-giugno-tre-regioni-in-zona-bianca-niente-coprifuoco/