Atra partida perdia sabudu a merì po su Casteddu de Mazzarri. Custa borta est s’Atalanta a si pigai is tres puntus a pustis de una partida chi is sardus ant giogau cun su coru. Aberu tropu fortis is lombardus, ca sa scuadra de Gaseprini est una de is meglius de totu su campionau. Est beru ca Joao Pedro iat postu sa partida in paridadi, a pustis su gol de Pasalic, ma a nai sa beridadi s’est bistu ca s’Atalanta iat airi bintu chena perunu problema. Antzis a dd’airi perdia feti aici, cun feti unu gol de diferentzia, est giai meda.
Sa classifica est sempiri peus: su Casteddu abarrat urtimu cun ses puntus, ma calencuna cosa si podit cumentzai a biri, ca non totu est perdiu. Certu est ca a perdiri sempri non giuata ma s’orroda giai at a girai in bonas e non sempiri in malas.
Walter Mazzarri, a pustis no airi fueddau in Bologna sa cida passada, fueddat chena s’atacai: “Tocata a castiai prus comenti eus giogau che sa classifica – at nau -. S’Atalanta est una de is scuadras meglius de totu s’Europa non feti in Italia. Eus fatu una bella partida a parrer miu, nos est mancada unu pagu de bona sorti. Finas chi teniaus calencunu chi no at possiu giogai, eus giogau comenti depiaus, po mei chi iaus pigau unu puntu non fut de seguru furau. In is urtimas tres partidas dus puntus ddus podiaus pigai, ma non girat s’orroda po nosu”.
Galu Mazzarri sighit a chistionai: “Seus gioghendu dogna tres dis e sussedint cosas de spantu, comenti cussu chi est sussediu a Keita. Oi eus giogau comenti cun sa Lazio, cun cuatr’omini in palas e in mesu de su campu e dus in denanti. Apu cicau de scioberai atras maneras de giogai, ma apu perdiu giogadoris de importu mannu che Dalbert”.
Imoi su campionau si frimat ca giogat duas bortas sa Natzionali de s’Italia: “Teneus giogadoris medas chi partint, soi cuntentu, finas chi no eus a tenni totu sa cida po nos aprontai”.
Su benidori podit agiudai: is partidas chi erribant funt cun su Sassuolo, sa Salernitana e su Verona.
Màuru Mura
Foto: https://www.youtube.com/watch?v=q3EGKvRfVN0
