Eriseru is sardus, de totu is idadis, in dogna corrunconi de sa Sardigna funt calaus in strada po si ponni a costau de is pastoris chi funt batagliendu po su pretziu de su lati.
Pipius medas in Deximeputzu cun is scolas maternas, elementaris e medias, finas chi is scolas funt abarradas obertas is babus e is mamas ant scioberau de non mandai is figlius. In Serdiana puru sa matessi cosa, pipius, cun cartellonis e pandelas, a manu pigada de babus e mamas ant manifestau in sa prassa de sa biblioteca e is pastoris ddis ant arregalau su lati. In Brucei is cumerciantis oi serrant is butegas e de is 11,30 s’ant atobiai paris a is aministradoris, is studentis e totu s’orrestu de sa popolatzioni po chistionai de cussu chi c’at de fairi. In Oroteddi is pipius e is piciocus ant a partiri de su biginau de Mussinzua po erribai in su centru aunia is pastoris ant a fairi su casu.
In Macumere, sa bidda prus manna de su Marghine, in duamila funt calaus in strada e aici in atras biddas puru che Santu Engiu, Mara, Seui, Sadili, ecc…
Su primu atobiu cun sa Regioni e cun is industrialis est andau mali, sa lota de is pastoris sighit.
Foto: unionesarda.it
