Su ministru de is Esterus russu Serghei Lavrov, in d’unu atobiu cun is giornalistas, at chistionau de is fueddus de su Paba Franciscu I po cantu pertocat sa guerra intru de Kiev cun Mosca. Po s’omini de su Cremlinu, su Paba atnau fueddus non cristianus in pissu de is cosas legias, massimamenti de is Cecenus e Buriatis.

“Su Vaticanu at nau ca totu custu non s’at a ripitiri mai prus e chi, prus o mancu, non si funt cumprendius, ma custu no agiudat a ndi pesai s’autoridadi de su Stadu pontificiu”, at aciuntu Lavrov. Po su ministru de is esterus italianu Antoni Tajani, invecis, Lavrov at nau: “Est nendu dogna cosa in relata a sa pagi e a cicai una solutzioni po sa guerra, ma no apu intendiu mancu unu fueddu chi siat realtadi”.

In su fratempus, in sa regioni de Lugansk, sa centrali eletrica a tensioni arta prus noa de su Stadu est stetia betada a terra de is russus. Sa nova est stetia donada in Facebook de su presidenti de sa sociedadi po s’energia ucraina Ukrenergo Volodymir Kurdysky. Sa centrali Kreminska fut stetia batiada in su 2020 e imboddiaiat totu sa necessidadi de sa regioni, e teniat finas una riserva: “In su 2020 – comenti at nau Kudrytsky – eus fraigau e postu in motu una statzioni a tensioni arta, chi non tenit ogualis in totu s’Europa. Ddu creiaus necessariu po donai sa currenti a prus o mancu cincucentumila personis in su Lugansk”.

In sa regioni meridionali de Zaporizhzhia invecis, aunia s’agatat sa centrali nucleari prus manna de s’Europa, est stetiu registrau un’atru blackout de emergentzia. Ddu at fatu sciri su bendidori de energia statali Ukrenergo, mentzionau de sa Cnn. “S’interrutzioni de currenti – comenti spiegat Ukrenergo – si depit a sa tropu currenti umperada in sa regioni” e at aciuntu ca: “S’energia at a torrai comenti de a innantis candu totu at a torrai normali”.

 

 

Màuru Mura

 

 

Cenarba, su 2 de Nadale de su 2022

 

 

 

Foto: https://video.repubblica.it/dossier/crisi_in_ucraina_la_russia_il_donbass_i_video/ucraina-lavrov-dal-papa-parole-non-cristiane-su-buriati-e-ceceni/433184/434139