Cuatru funt is mortus de eris e atrus 1.172 is impestaus a su Covid-19 po cussu chi narat su bulletinu regionali. Is tamponis fatus funt 9.828 e duncas sa percentuali est de cuasi su 12%. Bessit de tres su numuru de chini intrat in sa terapia intensiva, imoi funt bintinoi, e de dixianoi cussu de chini imbucat in is atrus aposentus de is spidalis, chi lompint a 325. Abarrant incungiaus in domu in 27.393 poita in 2092 funt torraus a biviri comenti faiant a innantis. Is cuatru mortus funt un’omini de setantases annus chi biviat in sa citadi metropolitana de Casteddu, una femina de otantases annus e un’omini de otantotu de sa provincia de Tatari e una femina de otantacuatru chi biviat in sa provincia de Aristanis.
S’abasciat, duncas, de su 34,1%, cunfroma a sa cida passada su numuru de impestaus a su Covid-19 in Sardigna. In sa cida chi andaiat de su bintitres a su primu de martzu passau, po cussu chi narat s’atentzioni de su Sotziu Gimbe, teneus finas numurus meglius intru de is centumila abitantis. Calant in sa provincia de Aristanis (790 dogna centumila) in su Sud Sardigna (521) in sa citadi metropolitana de Casteddu (494), in Tatari (492) e in Nugoro (278).
Abarrant galu artus is numurus po is impestaus a intru de is spidalis, ma sa nova bona est ca si funt abasciendu a intru sempiri de is centumila abitantis.
In s’orrestu de s’Italia sighit, po sa cuinta cida de sighiu, s’abasciamentu de is impestaus. Sempiri de su 23 de friargiu a su primu de martzu is impestaus funt stetius 275.376 cunforma a is 349.122 de sa cida a innantis. A s’abasciai funt finas is mortus chi in sa cida passada funt 1.488 cunfroma a is 1.828 de sa cida prima.
Calant a corantaduas is provincias cun prus de cincuxentus impestaus dogna centumila abitantis, e intru de custas, comenti eus giai nau, ddue funt Aristanis e sa provincia de su Sud Sardigna.
3 martzu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.rainews.it/articoli/2022/01/Dal-1996-la-Fondazione-GIMBE-divulga-il-proprio-know–how-con–formazione-editoria-e-ricerca-0dae4242-0c14-43e8-b945-22483a1908b9.html
