Non po sempiri, crareus, ma feti po fairi unu giru in is atrus museus de sa Francia. A oberri ai custus viagius, po fairi lassai sa domu parigina a una de is operas mannas de Lionardu de Vinci, est stetiu Francoise Nyssen, su ministru de sa Cultura francesa.
“Non biu poita certas cosas depant abarrai frimas”, at nau Nyssen chistionendu cun Europe 1, sa televisioni francesa. Insighendu a nai: “Tocat sempiri a donai croba a allogai beni is operas e a pensai beni a-i cussu chi bolint nai. Deu, de parti mia, apu sempiri pensau de non bolli mai atacai nudda e ca sa cultura non depit essiri atacada. Po custu, una de is cosas chi bogliu fairi est a fairi girai is operas”.
Inderetura calencunu s’est giai fatu ainnanti po tenni sa fortuna manna de podiri tenni sa Monna Lisa. Su sindigu de sa citadi de Lens, Sylvain Robert, difatis at scritu a Emmanuel Macron po pigai, po calencunu tempus, su cuadru prus famadu in su mundu e ddu ponni in is museus de su Cumunu.
“Eus a benni a biri”, s’arrespusta de su presidenti de sa Repubblica. In s’ora tocat a biri comenti s’ant a ponni is cosas, in su mentris s’Italia puru, chi dd’ant a fairi girai foras de sa Francia puru, iat a podiri bisai de torrai sa Gioconda in domu sua.
Foto: corriere.it
