Non funt tempus bonus po Joe Biden. Su presidenti de is Stadus Unidus de s’America torrat a chistionai in is televisionis de comenti is sordaus americanus si funt fuius, coidendu e chena pensai meda, de s’Afghanistan: “Eus scioberau in manera sabia e giusta po s’America. Est ora de dd’acabai cun custa gherra, deu tengiu sa cuscientzia beni posta ca cussu chi apu nau a innantis de diventai presidenti ddu soi fendu”.

“Mi pigu totu sa responsabilidadi – at sighiu a nai -. Depia scioberai intru de nosi nd’andai, comenti funt is acordius pigaus de chini ci fut a innantis de mei, o de fairi erribai in Afghanistan atrus sordaus. Non boleus torrai a oberri un’atra gherra chi iat durai annus meda. Imoi depeus castiai a su benidori e cicai de binciri is bataglias de custu seculu, comenti sa cumpetitzioni cun sa Cina e sa Russia. Su mundu est mudau”.

Est passada feti una dì de candu s’urtimu aparechiu militari at lassau Kabul candu Biden si presentat in televisioni po cicai de girai, po sempiri, custu contu. Chistionat puru de is militaris bocius de su Isis-K e amelessat is terroristas: “Bos seus a sighiri finas a s’inferru, no acabat aici e dda eis a pagai”.

Cuntentu meda est partu candu at fueddau de comenti totu est andau beni po ndi fairi torrai is 4.500 americanus a domu. Imoi funt feti 200 cussus chi s’agatant in Afghanistan e avertit Biden: “Candu bolint podint torrai a domu, po issus non teneus peruna scadentzia”.

Ma no est cosa facili, po Biden, cussa de cunvinciri sa genti. A totus a si fuiri est partu comenti a s’arrendiri e non funt pragias is imaginis de is talebanus chi faiant festa a pustis una gherra de bint’annus chi a is americanus est costada 2.300 miliardus de dollarus e prus de 2.400 mortus.

A dogna manera est unu presidenti cuasi abarrau solu: is republicanus bolint chi si nd’andit e finas chini ddu at sempiri difendiu est inchietu meda.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto: https://ilmanifesto.it/il-fuggi-fuggi-secondo-biden-un-successo-straordinario/