Funt undigi is cunsiglieris regionalis chi eus agatai candidaus finas po is eletzionis politigas de su 4 de martzu. Chi pensaus chi in totu su Cunsigliu funt in sessanta podeus nai ca funt su 18%.
Su primu de sa lista est de seguru su Presidenti etotu de su Cunsigliu, Giuannifrancu Ganau de su Partidu Democraticu candidau po su Senau. Sempiri cun su partidu de Renzi agataus su tataresu Bainzu Manca, s’ogliastrinu Francu Sabatini e s’oristanesu Antoni Solinas. Sempiri de sa maggiorantzia ma candidau cun Liberi e uguali de su presidenti de su senau Perdu Grasso agataus Luca Pizzuto.
Foras de sa Sardigna agataus Anna Maria Busia candidada cun su Centro Democratico. A Roma bolit torrai finas Giorgio Oppi e difatis ddu agatau in is candidaus. Foras de sa Sardigna, po su Senau, at a curriri finas Christian Solinas, segretariu de su Psd’Az.
Su partidu de Berlusconi invecias at a biri in is listas suas is cunsiglieris Perdu Pittalis, Pepi Fasolino e su presidenti beciu de sa Regioni Ugo Cappellacci.
