Is fueddus iant a podi essi tropus. Su tanti de preni pàginas e pàginas, librus e librus. O iant a depi essi nudda. Ca bastat sa mùsica. E fait a si citiri e a baddai e a cantai. A si lassai andai, a si movi che macus finas a isvenni. Aici fait e at a fai meda genti ancora. E ddu fait de cincuant’annus. Poita custu est s’anniversàriu de is Rolling Stones, po medas sa band prus manna de totu is tempus. Non fait, e nimancu serbit a nudda, a fai in pagu rigas una lista de is cantzonis prus bellas e famadas de is Stones.Caliponni in conca a totus? Angie? Paint it black? Satisfaction? Sympathy for the devil? Gimme shelter? Tocat a si firmai innoi, est mellus. Ca funt centu e centu is cantzonis chi méritant e donniunu at a tenni is preferéntzias suas. Una cosa est a dda nai, perou. Chini no at cumpréndiu is Rolling Stones no at cumpréndiu su mundu de sa mùsica rock e blues, de su noixentus a imoi.   Seus chistionendu de is fundamentalis, de sa perfetzioni. De forma e de sustàntzia. Arti, istili, fortza, maia, amori, bellesa, barra, elegàntzia, coragiu, dilicadesa, in is cantzonis de is Stones s’agatat totu. Totu nascit, totu amànniat finas a celu. E non fait mancu a acinnai a sa biografia istremenada de custu grupu chi passat comenti iscincidda de fogu in su celu de su1962 aoi. Una cosa de ispantu. E chi no est unu record, pagu amancat. Calencunu, cun erriscu, ddus intzérriat beciteddus. Tocat a si ddu nai in cara, perou. Tocat a si ddu nai, mancai, apustis de ai inténdiu unu cuncertu insoru. Seus chistionendu de su mitu. De una mannària sena làcanas. Ddu bollaus o no ddu bollaus amiti, custa at a essi, chi su mundu abarrat in peis e s’intelligéntzia no isvanessit in su nudda, sa mùsica clàssica de su tempus benidori, fra tres séculus. Ca artistas aici non nascint dónnia dî asuta de su cauli a frori.   Generatzionis: babbais, mammais e fillus ant viagiau peri su mundu iscurtendu is Stones de is cascias de su stéreu, de monti a pranu, de is autostradas prus mannas finas a is àndalas prus disconnotas de sa terra. Ca sa mùsica insoru at sonau e sonat in is cincu continentis, in dónnia domu: vinilis, musicassetas, cd o mp3 chi siat. Is Stones bincint su tempus. Medas registas puru ant bófiu contai custa carrera prena de sucessu e de machìminis. E medas ancora dd’ant a fai. Aici sucedit a is reis. “Everybody’s dreaming/ Everybody’s screaming/ Watching the rain fall down” cantat Mick Jagger in ‘Rain fall down’, una cantzoni presenti in s’ùrtimu album de is Stones, ‘A Bigger Bang’, de su 2005. Un’album chi tenit prendas de valori, fatu 43 annus agoa de sa bessida a campu. Beciteddus? Ma mancu po nudda! E duncas: “totus cantus sonnant, totus cantus abóxinant, castiendu s’abba calendu de celu”.   Fueddus sèmplicis, beridadosus, prenus de maia e allutus de gana de bivi. Comenti su rock etotu, chi no est feti unu gèneri musicali. Su rock est un’istili de vida. E cali band est s’isprigu prus fideli de su rock chi no is Rolling Stones? Is perdas chi orrùmbulant e orrùmbulant e orrùmbulant. De cincuant’annus. Mesu séculu. E non funt po nudda fadiadas. Nudda de ita biri cun is rock bands chi ndi bessint a campu imoi, sena càrriga, totu trassa e nudda sustàntzia. Fatas aposta po bendi discus, po andai in televisioni, cantai po una pariga de annus (chi andat beni, calencuna durat un’istadi o finas prus pagu) e agoa isparessi in su nudda. S’istória de sa mùsica non si fait aici: si fait dî po dî, album agoa de album, cuncertu po cuncertu. Si podit diventai erricus, famaus, ma s’abarrat etotu a foras de su témpiu de sa musica chi contat. Perda in pissu de perda, is Rolling Stones ndi dd’ant pesau, su témpiu de sa musica rock, non tocat a si ddu scaresci mai. Po cussu feti una cosa si podit nai a custus maistus, a Mick, Keith, Ronnie, Charlie: augùrius Rolling Stones. Po su chi disillais.