Un’abogau chi at iscritu calincuna tra is pàginas prus nodias de sa musica italiana connota finas foras de làcanas. Bastat feti su nomini: Pàulu Conte.
Nascit in Asti in su 1937, e fut figliu de unu notaiu. Giai de piciocu cumentzat a sighiri cussas chi ancora a dî de oi funt is passionis suas: su jazz americanu e is artis figurativas. In su tempus de sa guerra andat a biviri in domu de sa nannai e innoi, po mori de su babbu e de sa mama, amantiosus de mùsica popolari, cumentzat a imparai a sonai su pianu. Funt is annus de su fascismu e su babbu comporaiat de contrabbandu is discus de atrus stadus strangius, poita funt proibbius in Italia, fendu nàsciri in Conte s’amori po su jazz. A ddu contai at a èssiri su musicista etotu in-d-una intervista de is annus 80: “Mussolini iat proibbiu sa difusioni de sa mùsica americana e de su jazz. In cussus tempus fut però dificili a donai atentzioni a totu”.
Abogau de professioni, trabagliaiat in su stùdiu de su babbu ma in su 1974, Conte lassat s’arti sua po si dedicai feti a-i cussa artistica. Bessit su primu album e s’annu infatu un’atru ancora. Funt custus trabaglius chi sinnant su caminu nou chi at pigau su cumposidori astigianu.
A sa matessi manera de su chi est sussediu po su maistu de Pavana, Franciscu Guccini, Pàulu Conte puru s’acòstiat a su mundu de sa mùsica comenti de autori po atrus artistas. Pighendu po esémpiu s’ammaju chi podit donai su cinema e sa literadura cumentzat a iscriri cantzonis comenti La coppia più bella del mondo, Azzurro, Messico e Nuvole, Genova per noi, scritas in manera originali de Pàulu Conte, ma cantadas de atra genti famada: Celentano, Caselli, Jannacci e Lauzi. Prus de una borta scrit paris cun su fradi Giorgio.
Su 1979 est s’annu chi ddu fait connòsciri meda e is cuncertus sûs funt sighius de una surra de genti gràtzias finas a una bella cantzoni: Un gelato al limon. A pustis de dus annus at a tenni una de is soddisfatzionis prus mannas de sa carriera sua, difatis su discu chi bessit in su 1981, Paris Milonga, benit presentau in-d-una giornada intregada a issu aprontada de su Club Tenco in Sanremo. Is discus chi ant a bessiri de tandu in sus funt sempiri bistus beni de sa crìtica e de is espertus. affinità
S’abogau de Asti est agradessiu mascamente in Francia, candu sonat in su Théatre de la Ville de Parigi. Una relata manna cussa intru de Pàulu Conte e is francesus, relata chi Conte etotu at sempiri abbau. Difatis candu chistionat de Parigi narat sempiri ca est sa citadi cun s’ammaju prus mannu po is artìstas. Própiu fueddendu de is primus cuncertus in sa citadi francesa at nau: “Parigi po mei est stétia de importu mannu. Cussu chi m’est pragiu de prus est ca m’ant fatu cantai, in is primus cuncertus, in su tiatru de la Ville. Cuncertus spantosus ca po tres dis non s’agataiat una cadira sbuida”.
Una borta connotu in Francia po Conte si funt obertas is jannas de totu s’Europa: in Germania, in Belgio e Olanda e finas in-d-una terra dificili po sa mùsica chi erribat de foras che-i s’Inghilterra Pàulu Conte at tentu onoris.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://it.wikipedia.org/wiki/Paolo_Conte
