In sa partida cun s’Irlanda de su Nord binta po 2-0, chi serbiat a s’Italia po si giogai sa finali martis chi benit in Bosnia, s’allenadori Gattuso at fatu imbucai finas su giogadori de su Casteddu, Marcu Palestra. Sa partida, comenti eus nau binta po 2-0, cun gol a innantis de Tonali e dapoi de Moise Kean, fut de binciri po lompiri a is mondialis de Fubalu de ocanni chi benit. Ma serbit ancora una partida foras de domu, po ddue lompiri. Chini est a metadi de su trabbagliu est giai postu beni
Fustis nendu de Marcu Palestra, chi ocannu at spantau a totus po sa grandu gana e grandu cursa chi at amostau. Ma, finas peis deretus tenit su giogadori de su Casteddu. Chi, a dogna manera, at chistionau cun is giornalistas a s’acabbu de sa partida: “Est stetia una emotzioni chi non connoscia, a innantis de totu poita eus bintu e immoi teneus s’ocasioni de nosi giogai sa finali. E in segus sa prima borta chi bestu s’asulu de sa Natzionali. Cust’ora dd’apa a tenni a intru po totu vida”, at cumentzau a nai su tertzinu de su Casteddu, chi at a pustis sighiu: “Apu fatu annus medas in s’Atalanta, apu biviu esperientzias mannas e soi cuntentu de airi giogau, po sa borta de unu, in sa matessi Bergamo”.
Chistionendu, invecias, de sa partida sempiri Palestra at nau: “S’Irlanda fut una scuadra segura e cuncentrada meda. In sa prima parti non s’at lassau ocasionis medas, ma una borta chi eus fatu su gol cun Tonali, si funt obertus de prus. Sa truma e totu cussus chi trabbagliant cun Gattuso funt de averas genti capassa. Scieus ca sa Bosnia est scuadra de valori, ma is calidadis nostas funt mannas e teneus totu sa gana de binciri e torrai a nosi giogai su Mondiali. S’Italia mancat de tropu tempus”.
S’Italia est calada in campu cun custus ominis: Donnarumma; Mancini, Bastoni Calafiori; Politano, Barella Locatelli, Tonali, Di Marco; Kean, Retegui. In sa parti de dus funt imbucaus Gatti, Esposito, Pisilli, Palestra e Raspadori.
