Genti meda, chi lompiat de totu sa Lombardia e de s’orrestu de s’Italia de pissu, at sighiu su Casteddu de Ranieri in sa partida de custu pusti prangiu in Monza. Sa spera fut cussa de su sighimentu in su ponni puntus po si sarvai in sa scartina. Aici no est sussediu ca is piciocus de Palladino ant bintu sa partida. Est bastau unu gol de Tanieli Malini, figliu de Pàulu e nebodi de Cesare, po permitiri a is brianzolus de si portai a domu insoru tres puntus. Est a nai ca su Casteddu no at fatu meda, ma sonumancu unu puntu si podiat pigai.
Duncas si frimat a cuatru partidas sa filera de su Casteddu aunia at fatu puntus.
“Comenti de gana, barra e manera de giogai eus fatu cussu chi depiaus, non possu nai nudda a is piciocus”, narat Claudiu Ranieri a s’acabbu de a cuntierra. “Po nosu non mudat nudda, ddu scieus de su cumentzu de su campionau ca depeus gherrai finas a sa fini. Depeus giogai dogna partida cun sa matessi barra, dapoi eus a biri comenti andat. Bolia donai miniscimentu a Maldini chi at agatau su corrunconi po fairi gol, su Monza tenit giogadoris de importu e de calidadi chi podint fairi gol sempiri”. Comenti eus nau fut meda sa genti sarda lompia in Monza e su matessi Ranieri ndi chistionat: “Boliaus fairi una partida bona po issus, seus allirgus meda ca bengiant a nos agiudai. Feti aici nosi podeus sarvai, poderendusì unu cun s’atru”.
Su Casteddu oi fut chena giogadoris medas, massimamenti indenanti, ma finas in palas aunia mancaiat Mina. “Seus custus, calencuna partida si ndi pesat beni e atras unu pagu de mancu. Depeus sighiri e cicai de torrai a fairi giogai chini oi non ci fut”. Po su Casteddu e totu sa Serie A immoi si frimat su campionau, is segus sa partida de importu mannu de su lunis de Pasca cun su Verona. Ranieri tenit spera e fidi po calencunu chi oi non ci fut: “Creu chi Mina, Luvumbo e Gaetano ce dda podint fairi. Est sempiri meglius a tenni prus giogadoris a disponimentu. Po nosu cumentza sempiri unu campionau nou, a dolumannu est sempiri aici. Ma aici, comenti ddu est po nosu, est finas po is atras scuadras”.
Màuru Mura
Sabudu su seigi de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=0As9CcNHmTk
