In Sardigna sa vitoria de su No est ancora prus manna. Is sardus ant scrocorigau sa riforma de su Guvernu Meloni, ca at pigau una batosta in s’Isula.
In is cabinas eletoralis funt lompius su 52,8% de is sardus: su No at bintu cun sa percentuali chi s’acostiat a su 60%, a nai beni su 59,44%, contras de su 40,56% de su Si.
Su numuru de Casteddu, est a nai su 59,16%, assimbigliat meda a cussu regionali. Su No bincit de meda in su Nugoresu, aunia si bessit a su 64,1%. Finas in sa provincia de Tatari, cun su 61,5% e in su Campidanu de mesu, cun su 63,8, su No giumpat su 60%. In su Aristanesu, chi est de sempiri terra de centrudresta, su No s’agatat a su 56,8%, in su mentris chi in su Sulcis, cun su 59,6%, s’acostiat a su numuru regionali. Sa sola suta regioni aunia sa partida est stetia giogada est sa Gaddura, aunia at sempiri bintu su No, ma cun dd’una percentuali prus bascia meda, su 50,77.
In is citadis sardas aici est andada: In Casteddu su No in pissu de su 61%, in Aristanis su 57,7%, in Nugoro su 69,4%, in Tatari su 63,7%, in Terranoa su 52,5% in Carbonia su 65,8 % e in Igresias su 60,3 %.
Alissandra Todde, chi eris a tentu su cumandu de is tribunalis de sighiri a guvernai, ma paghenduru una multa de 40 mila eurus, at nau sa sua: “Sa Costitutzioni italiana s’est sarvada e abarrat sa lugi de su fairi nostu. Soi allirga meda po su numuru mannu de su No in sa terra nosta”. Aici e totu at bofiu nai sa sua su sindigu de Casteddu, Massimu Zedda: “Sa chistioni chi in medas siant andaus a votai, bolit nai ca sa democratzia nosta est sembri bia. Is italianus e is italianas amostant, cun sa vitoria de su No, de tenni in su coru sa Costitutzioni de is babbu mannus nostus”.
Duncas, comenti de sempiri, duas campanas: cussa de chini at bintu chi funt cuntentus de airi sarvau sa Costitutzioni, e cussa de chini at perdiu, chi si chesciant de s’ocasioni perdia.
Foto: https://www.corrieredelsud.it/nsite/2016-07-14-15-53-27/prima-pagina/34242-referendum-con-la-vittoria-del-no-si-mantiene-lo-status-quo-costituzionale.html
