A cuasi unu mesi de su bocidorgiu de Renee Good e a binti dis de cussa de Alex Pretti, bocius ambos po manu de dus agentis de s’imigratzioni in Minneapolis, s’aministratzioni de Donald Trump at decidiu, in parti, de fairi unu passu a palas. Tom Homan, s’omini a su cali su presidenti at donau una de is pratigas prus diligas de sa presidentzia sua, at annuntziau su stesiamentu, inderetura, de setigentus ominis de s’Ice de sa citadi de su Minnesota. Nd’abarranta, a dogna manera, duamila, ma s’obietivu est de abbasciai ancora de prus su numuru.
Trump in dd’una intervista cun Nbc at nau ca sa decisioni de stesiai is agentis est sa sua: “De cantu sussediu in Minneapolis eus imparau ca, forsis, depeus essiri unu pagu prus moddis in pissu de is imigraus, ma tocat a essiri su matessi tostaus”.
Una nova bona, duncas, po sa citadi chi de dus mesis bivit intru de terrori. Homan, chi at pigau su cumandu in Minnesota, at nau ca s’operatzioni est stetia unu spantu, finas chi non totu est andau a sa perfetzioni. E at avertiu ca abarrendu in citadi su trabbagliu cumentzau at a tenni un’acabbu.
Su guvernadori de su Minnesota, Tim Walz, at invecias nau ca s’arretiru “est su passu de unu bia sa diretzioni giusta”, ma at pediu chi s’arretiru de sa terra sua iat essi unu pagu prus lestru. Ma, po chini cumandat, totu iat essi prus lestru cun s’agiudu de sa cominidadi e de is autoridadis. Walz, chi paris a su sindigu de Minneapolis Jacob Frey, s’est postu contras custu disacatu, at fians nau ca su trabbagliu de s’Ice “non at rendiu su Minnesota prus seguru”.
In custas oras at fians fueddau s afamilia de sa femina, Renee Good, bocia su seti de gennargiu: “Cussu chi est sussediu at mudau sa vida de totus”, at nau Luke Ganger, unu de is fradis de sa Good.
