Funt serbius setantases annus de autonomia po agatai sa femina de unu a ghiai sa Regioni de sa Sardigna. S’eletzioni de Alissandra Todde est una nova manna po sa Sardigna e lompit a pustis de corantatres annus de candu sa prima femina fut bessia in is pumus artus in dd’una Regioni. Fut sussediu po s’abrutzesa Anna Nenna D’Antonio. In su Consigliu Regionali sardu nou ant essi feti noi is feminas intru de sessanta consiglieris. Forsis dexi chi Ivana Russo, de su Partidu Democratigu, giumpat calencunu in sa conta de is orrestus. De custas noi feminas, ses funt parti de sa magiorantzia (Camilla Soru e Carrula Fundoni de su Pd, is steddadas Desirè Manca cun Lara Serra, sa sindaga de Guasila, Pàula Casula de Manca benidora e in prus sa matessi Todde). Is atras tres funt de su centrudrestra, Francisca Masala e Cristina Usai de is Fradis de s’Italia e Alice Aroni de s’Udc. Funt pagas de averas, su cuindixi po centu,, finas chi s’agatat una lei, cussa de sa dopia preferentzia, chi ddas iat airi depias favoriri. Is numurus de is feminas imbucadas in Consigliu Regionali funt cuasi ogualis a cussus de cinc’annus a immoi, ca tandu funt otu. Finas chi, est a nai, in caminu, funt crescias a dexi po mori ca Rossella Pinna, de su Pd, iat bintu un’arrecursu contras de unu consiglieri mascu e Alice Aroni fut imbucada po Giorgio Oppi, a pustis sa morti sua.

Numurus chi cundennant sa Sardigna in sa positzioni de cuindixi, intru de is regionis italianas cun prus feminas in is consiglius, classifica chi est ghiada de su Molise, Emilia-Romagna, Toscana e Latzio. In totu, de su 1948 a oi, is feminas imbucadas in is aposentus de sa Regioni funt stetias setantotu contras de is prus de setixentus mascus.

In is eletzionis de unu de su 1949 ci dda iant fata is democristianas Pierina Falchi Delitala, chi a pustis at fatu cincu legisladuras, e Eufemia Sechi e sa comunista Claudia Corona Lombardo. Ma sa tristura prus manna est stetia in su 1969, candu feti una femina, Elodia Macis de sa DC, est imbucada intru de is consiglieris.

In is matessis setantases annus de autonomia feti un’atra femina, Claudia Lombardo de Fortza Italia, est deiventada presidenti de su Consigliu de su 2009 a su 2014. Po cantu pertocat, invecias, is giuntas regionalis oi is presidentis tenint s’obrigu de ndi ponni sonumancu su 40%. Mancu mali.

 

 

 

Màuru Mura

 

 

 

Cenarba s’otu de martzu de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ansa.it/sardegna/notizie/2023/01/19/redditi-consiglieri-sechi-udc-al-top-solinas-e-ottavo_8450179e-784f-4923-b709-b6bd51288202.html