“Est stetia posta a un’ala una manera de trabbagliai in continuidadi, comenti chi calencunu cun dd’una pinna apat cancellau cussu chi si fut fatu in su tempus passau”. Aici Massimu Zedda in sa prima intervista a pustis sa festa po essiri torrau a diventai sindigu de Casteddu. Zedda, eris a mengianu, at chistionau in sa trasmissioni “Caffè Corretto” dirigia de su capuredatori de s’Unioni Sarda, Giusepu Deiana. Su sindigu at fatu un’esempiu: “Is trabbaglius in su Poetu, in prassa Arcipelaghi. Apu bidu ca funt ponendu palus de sa lugi diferentis cunfroma a cussus de totu s’orrestu, palus chi funt lamaus in su progetu nostru propriu ‘Poetu’, poita pensaus feti po cussu logu. Mi pregontu comenti est stetiu possibili. Ma custu est feti un’esempiu. Unu pagu comenti chi calencunu, in domu sua, iat a pensai de ponni dogi tipus de matonellas in su matessi aposentu”.
Su giornalista at, in segus, pregontau calencuna nova in pissu de sa giunta noa chi at a cumandai in is cinc’annus benientis. “Oi ap’a intendiri is segretarius de Casteddu e de sa provincia de su Partidu Democratigu, chi est su partidu chi at coordinau sa coalitzioni in custa torrada eletorali, in manera chi si possat inderetura chistionai e cumentzai a pensai in pissu de sa calidadi de is feminas e de is ominis chi ant a fairi parti de sa Giunta. Possu nai ca ant essi assessoris in parti oguali intru de politigus e tecnicus. Depint essiri is matessis partidus a fairi lompiri is disiglius, ma depint essiri indicus de genti chi bagliat”.
Zedda, dapoi, at chistionau de sa citadi. “Casteddu est prena de sbarras in totue. Est un’amostu legiu de averas po is casteddaias e is casteddaius, ma finas po is bisitadoris. Parit totu unu logu betau a paris e custu de seguru no andat beni po nudda. Is cantieris? Non si podint mudai is cosas, finas chi a mei certus trabbaglius non mi pragint o non mi podint pragiri, comenti s’orruga de Dante. Tocat a cumprendiri comenti si possant migliorai. Ma, una cosa est ateretantu segura: is cantieris tocat a ddus acabbai in su tempus prus pagu possibili”.
Màuru Mura
Mercuris, su doxi de làmpadas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.comune.cagliari.it/portale/page/it/palazzo_civico?contentId=LGO37219