“Bogliu donai trancuillidadi a totus, pensai in beni. Soi forti, cun spera manna e sigu is curas de sempiri”.
A pustis sa nova de s’imbucada in su spidali un’atra borta, su giogadori de fubalu prus forti de dogna tempus, Pelè, chi de ocannu passau gherrat contras unu cancru a s’istentina, chistionat e bolit cunfortai totu cussa genti chi ddi bolit unu beni macu.
Su campioni, po cussu chi si ligit in su giornali “Folha de Sao Paulo”, una pariga de dis a oi est stetiu trasperiu in su repartu po is curas de su spidali Albert Einstein poita no iat arrespundiri a is terapias de chemioterapia.
Is curas chi est fendu Pele, chi ocannu est lompiu a is otantadus annus de idadi e in sa carriera sua de giogadori at bintu po tres bortas sa Copa Rimet, duncas is Mondialis in su 1958, 1962 e 1970, non funt donendu is resurtaus chi si speraiat e su cancru s’est moviu finas a is prumonis e a su figau. Candu is dotoris ant bidu totu custu ant decidiu de fairi atras curas po cicai de calami is doloris e de agiudai a tenni prus aria. Totu curas chi benint fatas a sa genti chi non tenit vida longa. S’atra dì su bulletinu de su spidali chistionaiat de un’infetzioni respiratoria chi beniat curada cun s’antibioticu. Pelè, de is profilus chi sighit in is social, iat chistionau de una “bisita mensili”.
Immoi, invecias, un’atru messagiu: “Bogliu torrai gratzias a totu is infermieris e is dotoris po comenti cicant de mi sanai. Deu tengiu fidi manna in Deus, e dogna messagiu de amori chi mi lompit de bosatrus, e chi erribat de totu su mundu, mi poderat prenu de energia. Est po cussu chi ce dda facu a sighiri is partidas de su Brasile a is Mondialis”.
Medissimus is messagius chi ddi lompint po ddi fairi coragiu. De cussu de su giogadori francesu Kylian Mbappè, a cussu de s’ingresu Harry Kane chi chistionat de Pelè nenduru: “Unu giogadori e una personi chi non tenit perunu paragoni cun nemus: unu esempiu mannu po totu cussus chi s’acostiant a una bocia. Boleus po issu dogna beni”, de is messagius de Neymar (“Fortza Pelè, pregaus po sa saludi tua”), Vinicius Junior e Rodrygo po erribai a cussu de s’allenadori de su Brasile, Tite: “Dd’auguru saludi manna, issu est de sempiri su rapresentati nostu. Is sentidus nostus funt po sa saludi sua”.
Màuru Mura
Lunis, su 5 de Mesi de Idas de su 2022
Foto: https://www.today.it/sport/calcio/pele-reparto-fine-vita.html
