Balint finas in Sardigna is noas, in chistioni de autovelox, postas in campu de su Guvernu, cun is aparechius chi pigant sa velocidadi chi de su 12 de triulas, po essiri in regula, depint essiri omologaus e non feti aprovaus. A ddu arregodai est Adiconsum Sardigna, chi donat finas is numurus uficialis de cussu chi godangiant is Cumunus e is regulas de sighiri po morrungiai is multas.
“Po su 2025 – narant de su sotziu – su cumunu chi at godangiau de prus, gratzias a su autovelox, est cussu de Murasteni chi at incassau 2.051.673 eurus. Deximu sighit cun cuasi 1,6 miliionis, in su mentris chi in Pauli su godangiu est de 650mila. Casteddu si frimat a 565mila e intru de is cumunus si stagliant finas Igresias cun 304mila, Su Masu cun 265 mila e Nugoro cun 122mila eurus”.
“Cun is regulas noas is automomilistas ant a tenni prus trasparentzia e possibilidadis in prus po cuntestai is multas illegalis – spiegat su presidenti regionali Adiconsum regionali Jorghi Vargiu –. Chini giumpat sa velocidadi massima andat puniu, non c’at duda, ma is citadinus tenit diritu de sciri chi is autovelox siant in regula”.
“In su specificu – narat sempiri Adiconsum – in is multas chi lompint de su 12 de custu mesi ddue depit essiri scritu s’omologatzioni de s’autovelox. Aici s’automobilista at a podiri biri, in sa cica natzionali de is autovelox publicau de su Ministeru de is Trasportus, aunia si ddue agatat totu. Chi s’autovelox non s’agatat in custa cica, sa multa podit essiri cuntestada, in su mentris chi tocat a verificai marca, modellu e matricola e cussu chi benit scritu in su verbali”.
Po cantu pertocat sa contestatzioni, arregodat sempiri de s’Adiconsum, “po cuntestai si podint sighiri dus caminus: cun arrecursu a su Giuigi de pagi a intru de trinta dis, o a su Prefetu a intru de sessanta dis de su lompimentu de sa multa. Tocat finas arregodai ca is multas pagadas non si podint morrungiai”.
Foto: https://siulp.it/nuova-normativa-sugli-autovelox-in-arrivo/
