Eris, in sa prassa Genneria de Seulu, Andria Negro, nasciu in Roma, pasciu in Padania aunia bivit, in Legnano, paris a sa pobidda Cristiana, at presentau su libru “L’Isola muta, viaggio nei silenzi della Sardegna” de sa domu de imprenta “Edizioni della goccia”. Su libru contat de candu Andria, che unu Lawrence noeddu, si ponit a girai sa Sardigna de parti in parti. A diferentzia de su scritori de “Mare e Sardegna”, chi giraiat in pissu de su trenieddu, Andria si movit in pissu de duas orrodas: su Beverly!

Su scritori padanu, lompiu in Terranoa in su mesi de austu de su 2021, candu galu sa pesta de su covid non fut binta, si carrigat totu in su Beverly e de sa capitali galluresa partit de unu logu de ammaju a s’atru. Est Orthullè sa bidda de unu chi prenit sa filera chi tenit in conca de fairi: a innantis a sa sola e, a pustis, cun sa pobidda Cristiana. In sa bidda de su “sòriche de àrbore”, Andria, si ddue stentat po ses dis e de is orrugas de Orthullè si ponit in caminu po s’acostiai a dogna prenda in is orus.

Cumentzat aici unu caminu intru de logus, biddas, maris e montis chi ant lassau in su coru e in is intragnas, de su scritori, spantus chi non connosciat. Aici, Andria sighit, sempiri in pissu de is udas orrodas, su caminu e si spantat, massimanenti, de sa genti chi atobiat: non ddi parit beru po comenti chine chi siat, chena ddu connosciri, ddu ponit in contu. Est curiosu meda e dogna cosa chi s’amostat a issu ddi parit unu bisu.

Candu si lassat a is palas su Supramonte e Su Gorropu e totu cussa parti de mundu, ci calat in su Iglesienti e, dapoi, torrat a bessiri in su Sinis. De dognunu de custas partis de Sardigna ndi scrit cun sabidoria, poita Andria est unu chi sa pinna dda scit umperai.

Su libru acabbat cun Séulu e is prendas de sa bidda de su sindigu Erricu Murgia. Tandu funt sa Stiddiosa, su casu in filigi e is centenarius a preniri is contus de su libru.

Sèulu, cun genti bastanti, eris a merì at rendiu onori a Andria. Fut cosa bona e giusta.

 

 

 

 

 

Màuru Mura

 

 

 

Giobia su dexi de triulas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.facebook.com/photo/?fbid=10228648539426974&set=a.3017474484442