S’est lassau orruiri in s’erba cun is manus in is ogus. E aici est abarrau po malencunu segundu: Jannik Sinner bincit po sa borta de dus, de sighiu, in Wimbledon.

A pustis airi bintu ocannu passau, su numuru unu de su mundu de su tennis, finas eriseru at torrau a binciri contras de su tedescu Aelxander Zverev in cuattur partidas: 6-7, 7-6, 6-3, 6-4.

“Binciri un’atra bia in Wimbledon est de non creiri. Soi allirgu finas poita sa finale est stetia una partida de arregodai contras de unu giogadori forti de averas. Depu torrai gratzias a totu cussus chi mi sighint – at nau cun sa copa in manus – e torru gratzias finas a mama mia, fut setzia in tribuna de dd’apu bida una pariga de bortas chi bessiat a foras ca fut nervosa meda”

In segus chistionat, ancora, cun fueddus durcis de s’aversariu: “As otentu unu de is obietivus chi tenias, est a nai a binciri unu torneu Slam in Parigi. Custa partida dda eus aici gherrada ca, soi seguru, as a binciri in Londra puru. Depeus donai atentzioni meda chi bolis diventai su numuru unu”.

E galu sighit su tennista de s’Alto Adige: “Ambos eus cumentzau beni. Soi cuntentu non feti de sa vitoria ma finas poit sa partida fut de livellu mannu. Po mei non s’agatat logu meglius aunia giogai a tennis. Intendis is nervius de candu ti ndi scidas su domigu a mengianu, poita non scis cantas bortas as a podiri torrai”. Sinner, in segus, at torrau gratzias finas a sa genti: “M’at donau totu is emotzionis chi unu gogadori possat agatai”. Non si nd’est scaresciu nemancu de is piciocus chi currint de una parti a s’atra po cuerai is bocigeddas: “Faint meda de averas po nosu”.

Inveciasa custus funti is fueddus de Zverev, chi de oi torrat a essiri su numuru dus in su ‘ranking’: “A innantis de totu, Jannik non mi pragis prus – at brullau su tennista tedescu – ma ancora una borta as amostau ca ses su tennista meglius de su mundu. E a giogai contras de tui est stetiu bellu. Bravu Sinner e finas totu cussus chi ddu sighint. Po cantu pertocat sa genti chi m’at agiudau, naru ca eus cumpartziu dus mesis bellus, finas chi eus perdiu sa finali. Innoi no ia mai giogau e oi fiu in finali. Immoi ci creu de podiri binciri, in su benidori, in Wimbledon”.

 

 

 

Foto: https://www.supertennis.tv/News/Slam/wimbledon-sinner-dichiarazioni-premiazione-finale-2026