De ses partidas est cumentzau su campionau de Serie A e su Casteddu ndi at giai perdiu cuatru. Feti dus is puntus fatus, unu in domu cun su Spetzia e s’atru foras de domu cun sa Latzio. Eriseru no est de cussas partidas perdias chi at spantau, ca si fut gioghendu cun su Napoli de Spalletti, sa sola scuadra chi at bintu totu cussu chi si podiat. Dus a zeru est acabada, e mai su Casteddu at donau s’idea de podiri fairi de prus. Cussu chi spantat est sa scuadra chi at postu in campu Mazzarri: andat beni a cicai de si difendiri, ma a fairi a timiri puru no iat essi cosa mali fata. Invecias, parit da s’allenadori toscanu at fatu cumprendiri a is giogadoris ca tocait feti a cicai de frimai is napoletanus chena. Feti unu a innanti e totu is atrus cun sa spera de portai a domu unu puntu. Fut stetiu meda prus coragiosu, cun su Napoli e totu, Semplici in su mesi de maju passau, candu ce dda iat fata a frimai sa scuadra de Gattuso chi fut currendu cantu e prus de imoi.
A dogna manera custus is fueddus de Mazzarri a s’acabu de sa partida de eriseru a merì: “Su Casteddu at fatu una grandu partida, massimamenti in difesa, ma in su primu tempus nosi est mancada unu pagu sa gana de fairi. Non si depeus scaresciri ca fustis gioghendu cun cussa chi est, imoi comenti de imoi, sa meglius scuadra de su campionau chi est fendu cuatru o cincu gol a partida. Sa tassa mesu prena est ca eus poderau e cuncediu pagu e nudda a su Napoli, chi su primu tempus fut acabau chena perunu gol iat essi stetiu giustu puru. In su pasu tra is dus tempus iaus decidiu de cicai de ddus atacai a sa fini de sa partida, ma su rigori de Insigne nos at segau is cambas. Torru a nai, su Casteddu at fatu una bella partida ca at giogau de scuadra, nos est mancau calencuna cosa candu depiaus torrai a partiri, ma teniaus in denanti una scuadra aprontada beni e cun giogadoris chi scint ita fairi de sa bocia”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.youtube.com/watch?v=DCSnTInUOKM
