S’Inghilterra bincit po 2-1 cun s’Olanda, candu sa partida pariat chi depiat sighiri cun is dus tempuas suplementaris, e si pigat su diritu de giogai sa finali de is Europeus de fubalu in Germania. A atobiai is inglesus de Southgate at essi sa Spagna chi s’atra dì, cun is gol spantosus de Yamal e Dani Olmo, iat bintu contras de sa Francia, chi a dogna manera iat segnau po prima cun Kolo Muani. Is duas partidas a innnatis de sa finali de Berlino, duncas, acabbant cun su matessi puntegiu. Ma a essiri favoressia po sa vitoria est sa Spagna chi, in custa torrada, at amostau su giogu meglius e is giogadoris prus fortis. Difatis is spagnolus ant bintu totu is partidas donendu spantus de giogu e ponendu in is pumus artus giogadoris de bocia de averas bravus, dus nominis in pissu de totus: su matessi Yamal e Nico Williams. Feti cun sa Germania, chi a dogna manera est una scuadra forti de averas, ant sunfriu, ma in totu is atras partidas ant bintu cun miniscimentus mannus.
Torrendu a sa partida de custu merì est a nai ca de su cumentzu sa scuadra de Koeman e cussa de Southgate si dd’ant giogada. S’Olanda, cun sa magligedda colori de arangiu, at segnau po prima cun dd’unu bellu gol de foras de area de Simons, a pustis seti minutus. Ma est abarrada po pagu tempus in vantagiu e difatis a pustis undixi minutus s’Inghilterra at segnau cun Kean.
Ma no est acabbada aici e ambas is scuadras ant cicau in dogna manera de binciri sa cuntierra: una bocia sarvada in sa linia de porta de is olandesus dapoi de una bella giogada de Foden; dus palus, unu po parti de Dumfries po is olandesus e de su matessi Foden, cun dd’unu tiru spantosu, po is inglesus. Totu custu is sa parti de unu de sa partida.
Is parti de duas sa partida s’est fata unu pagu prus legigedda ma, candu totu lassaiat pensai de si giogai atra mesora, una bella giogada de Watkins, chi fut imbucau a pigai su postu de Kean, at fatu bolai sa scuadra inglesa.
Màuru Mura
Mercuris, su dexi de mesi de orgiolas de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.calciomercato.com/news/olanda-inghilterra-live-84097
