Atru dinari po ponni in seguresa is caminus provincialis de sa Sardigna. Sa Giunta regionali at cumpartzius intre de is Cidadis metropolitanas e is Provincias sardas, 3,4 milionis de eurus po sa manutentzioni de is principalis caminus de s’Isula. “”Est dinari custu, chi s’agiungit a is setanta miliois giia postus a curriri”, narat s’assessori a is trabbaglius pubricus, Antoni Piu. “Dogna euru postu in prus est unu euru postu in campu po sa seguresa, un’orrogu de caminu chi depit andai a una viablidadi chi facat girai is machinas in seguresa e a mesura de is esigentzias de oi. Is prus de ses mila chilometrus de caminus provincialis chi s’amostant in Sardigna tenint abbisongiu de manutentzioni po frimai is numurus de is incidentis chi funt de prus cunfroma a su numuru mediu de s’orrestu de s’Italia”.
Su dinari, chi lompit de su torrai a fairi is contus de su programa de is interventus, est stetiu cumpartziu po sa mannaria de chilometrus de is caminus stradalis de calechisiat ente.
In is partis aici su dinari cumpartziu: a sa citadi Metropolitana de Casteddu, chi s’agatat cun 748 chilometrus de stradas spetant 429 mila eurus; in sa citadi metropolitana de Tatai, chi de caminus stradlis ndi contat1.526, ant a godangai 875 mila eurus; 444 mila eurus ant a lompiri in sa Provincia de sa Gaddura Nord-Est chi ant a serbiri a aconciai is 775 chilometrus chi tenit in poderi: a Sa Provinca de Nugoro, chi de caminus si prenit po 952 chilomentrus, andant 546 mila eurus; a sa Provincia de s’Ogliastra, chi tenit cumpetentzia po 265 chilometrus, spetant 152 mila eurus; po is 984 chilometrus de caminus de sa Provincia de Aristanis funt a disponimentu 564 mila eurus; a sa provincia de su Campidanu, chi si prenit de 335 chilometrus de stradas, ant a lompiri 192 mila eurus e a is 340 chilometrus de stradas de sa Provincia de su Sulcis-Iglesiente andant 195 mila eurus.
Chi serbat totu custu dinari, po ponni apostu is stampus mannus chi bortas meda funt sa causa prima de is incidentis.
