Eja, is camionistas, chi portant totu sa cosa chi agataus in is butegas chi nosi serbit a biviri, ant nau ca eja po unu scioperu, chi at a partiri de lunis chi benit chena si connosciri s’acabu, chi erriscat de frimai sa Sardigna.
Est custu chi nd’est bessiu a campu eris, a s’acabu de un’atobiu aprontau in Tramatza de prus o mancu trexentus camionistas, erribaus de dogna corrunconi de s’Isula po nai ca nou a su pretziu de is carburantis chi est bessendu finas a is steddas. Tres oras de inchietu e de morrungius comenti mai, in perun’atra ocasioni si funt bistus.
Sa nova fait a timiri a totus e comenti si est connota a postu sa genti in pensamentu. Cosas mai bistas: totus a comporai cosa de papai e a si preniri is machinas de carburantis. In dogna parti de Sardigna, de sa parti arta a sa parti bascia: butegas prenas de genti chi timit. Est unu mundu custu? Nou, giai ddu scieus totus ca no est cussu chi eus bisau. Peus de totus is poburus, cussus chi non tenint un’intrada segura e gherrant dogna dì po unu pratu de macarronis. Ma ita feus nosu e ita eus fatu finas a oi? Nudda, eus castiau s’ortigeddu nostu, nosi bastaiat e nosi bastat comenti andat sa vida a nosu e non castiaus su chi teneus a su costau. Sa beridadi est custa, non cicheus de abarrai a ingiriu de unu didu.
“Su scioperu at essi volontariu, ma sa bogi depit erribai a totus – at nau Massimilianu Serra, unu de cussus chi at aprontau s’atobiu de Tramatza –. Seus prontus a nosi frimai po nosi fairi ascurtai de chini cumandat. Aici non podeus andai a innantis. Non feti su carburanti, chi est lompiu a unu pretziu chi mai iaus possiu pensai, ma is morrungius nostus funt finas po su dinari chi ndi bessit de sa buciaca in donnia chi depeus bessiri in d’una navi, e cussu po aconciai is machinas o po cambiai is gomas. Non ce dda feus prus e po cussu de lunis chi benit nosi frimaus.
10 de martzu de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.rassegneitalia.info/canada-la-rivolta-dei-camionisti-per-la-liberta-tutti-in-marcia-verso-ottawa-contro-lobbligo-vaccinale-video/
