“Lompu in Sardigna in donnia, su prus possibili, e cun mei portu finas Angila!”. Angilu Sotgiu de is Ricchi e Poveri, chi s’agatant in su festival de Sanremo cumentzau de martis a merì cun sa cantzoni “Ma con tuta la vita”, non si ndi scarescit mai de sa terra de is arreiginis suas e massimamenti de sa Gaddura, aunia est nasciu in Trinità d’Agultu su bintidus de friargiu de su 1946. De innoi, candu fut ancora pipiu, est partiu cun totu sa familia in Genova, ma s’Isula dd’est sempiri abarrada a intru. At sempiri contau ca cun su primu dinari chi at godangiau, inderetura s’at comporau una domu in s’Isula Orrubia.

“In Sardigna si ddue agatat unu mari de spantu e sa genti est spantosa su matessi. A parti Angilu”, brullat sa nieddutza de sa truma, Angila Brambati. “Ddue seus calaus finas calencunu mesi a immoi e ddue torraus sempiri cun prageri mannu, aici nosi bufaus unu pagheddu de vermentinu, unu pagheddu de cannonau, abbardenti e cumentzat su spassiu”.

E paris, in pissu de palcu de s’Ariston, improvisant una “Corsicana”, cantu famau in pissu de is bandius torrau a ponni ponni de Maria Carta chi in dd’unu discu de su 1971 ddu iat lamau “Antoneddu, Antoneddu”. Finas chi su cantu de Angila Brambati, errit Sotgiu, “est mesu sardu”.

Eriseru funt stetius agradessius medas, ca funt torraus in gara a pustis de trintadus annus, dapoi ca in cussu palcu si ddue funt agataus po doxi bias. Ingirias e imboddiaus in dd’unu frocu orrubiu sa genti ddi at batiu is manus medas.

“Sa cantzoni nos at spassiau inderetura – contant Angilu Sotgiu e Angila Brambati –. Est frisca, allirga. Non sempiri tocat a aboginai po essiri bravus. Non biaus s’ora de bessiri in pissu de palcu cuns cussu frocu mannu de averas. Custa est sa manera nosta de biviri e chi nos at tentu paris finas a oi”. “Fui feti arriolada chi Angilu podiat orruiri, tandu iari errisiu meda – acingit sa Brambati – non seus lompius in Sanremo po binciri, ma po nosi spassiai”.

 

 

Màuru Mura

 

Giobia, s’otu de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.today.it/tv/news/sanremo/ricchi-e-poveri-vestito-fiocco.html