Est cuasi acabbau. De cras non s’at prus podiri pediri votus. Dominigu chi benit at essi sa dì de sa beridadi. Genti meda non di podit prus de averas de totu is impromintzias fatas in custas dìs. Ma finas custa est sa democratzia.
Po is cuatru candidaus a sa presidentzia, Alisandra Todde, Lughia Chessa, Renatu Soru e Pàulu Truzzu, oi est s’urtima dì de campagna eletorali.
Truzzu, candidau de su centrudrestra, at essi in su Sarrabus, cumentzendu de is cincu de merì, a rendiri bisita a is biddas de Santu Idu, Muravera, Castiadas e Cabronaxa aunia at atobiai is sindigus. Cun custus ant essi centubinti is logus aunia est lompiu po presentai su “Piano Sardegna” chi est su programa de sa coalitzioni sua.
Alisandra Todde, invecias, serrat su caminu in sa Fiera de Casteddu, a is ses de merì, in s’aposentu intregau a Pasolini: “Nosu seus su solu mudamentu possibili. Seus s’imbessi de su centrudrestra. Immoi, massimamenti, est su tempus aunia abbisongiat cumpetentzia, capassidadi e onestadi, po su beni de sa Sardigna e de is sardus”, at scritu in is social.
In sa capitali sarda s’at a amostai finas Renatu Soru, candidau de sa Coalitzioni sarda. S’atobiu at essi a is ses de merì in su Tiatru Massimo. “Su binticincu de friargiu est acanta, passaus custas urtimas dis domu po domu, caminu po caminu, sartu po sartu”, at scritu Soru In Facebook. Acingendu: “S’agatat una parti manna de is sardus chi ancora no at cumprendiu ca tenint un’atra possibilidadi. A custus ddi naraus ca est un’ora de importu chi podit de averas mudai sa vida nosta”.
Lughia Chessa, candidada de Sardegna R-Esiste, serrat invecias in Nugoro, a is ses e mesu in sa Biblioteca Satta. “Nd’aprofitu po arregodai – at scritu in is social – ca finas in is collegius de Tatari e de s’Ogliastra, aunia non eus presentau listas, si podit votai a mei etotu. In Ogliastra e in Tatari in sa scheda non s’at a agatai su simbulu, ma feti su nomini miu. Tocat a ddue ponni una grugi in pissu”.
Màuru Mura
Cenarba, su bintitres de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/02/21/a-tgr-sardegna-ultimo-round-candidati-scintille-soru-cronista_8d4eb5b7-fa56-4cd2-9f6d-066b80445ece.html
