Ibrahim Sulemana est unu giogadori de su Casteddu. Sa sociedadi ddu at comporau e fatu sciri in su giassu de internet. Lompit de su Verona po, prus o mancu, cuatru milionis de euros. Su giogadori, chi at fatui s bisitas medicas in Villa Stuart, at firmau unu contratu po s’acapiai a su Casteddu finas a su 2027.
Ma connosceus meglius su giogadori nou de su Casteddu. Est nasciu in Ghana su 22 de maju de su 2003 e fait su centrucampista. Podit essiri umperau comenti de medianu a segai su giogu, ma calencuna borta at fatu sa mezala puru. Est lompiu in is giovanilis de su Verona in su 2021 e a pustis airi giogau beni meda, at fatu sa prima partida in serie A su 9 de Santu Aine de ocannu passau contras de sa Salernitana. Partida perdia po 2-1 de is venetus. Est allirgu meda su giogadori ghanesu de erribai in Casteddu e ddu at fatu sciri inderetura scriendudeddu in instagram: “Soi cuntentu meda de lompiri in Casteddu. Cumentzat un’atru contu po mei. Fortza Casteddu”.
Immoi su Casteddu s’at a depiri fairi prus forti cun atras comporas, ca a passai de sa serie B a sa serie A est dificili meda. Ma sa seguresa de sa scuadra de su presidenti Giulini est setzia in panchina: Claudiu Ranieri. Cun s’allenadori romanu si dromint sonnus trancuillus e sa manu sua giai s’at amostai. Po chini creit in su distinu, de candu est lompiu un’atra borta in Casteddu, a pustis trint’annus, Ranieri parit chi est torrendu a ripitiri cussu giai connotu. Tandu iat portau su Casteddu de sa serie C a sa serie A in dus annus. Immoi, in d’una pariga de mesis, a portau sa scuadra in serie A, candu totu pariat perdiu. At a tenni abbisongiu de giogadoris chi imbuchint in campu cun gana e fieresa. Ma sa gana giai si dd’at amostai issu etotu. Bieus comenti at a trabagliai sa sociedadi, ca non tocat a perdiri totu s’allirghia chi sa scuadra at donau a is tifosus.
Màuru Mura
Lunis, su tres de triulas de su 2023
Foto: https://www.transfermarkt.it/ibrahim-sulemana/profil/spieler/982267
