Contras de su Modena, allenau de Tesser chi s’est setziu, in tempus passau, in sa panchina de su Casteddu, lompit sa partida de unu perdia de Ranieri. In su stadiu Braglia acabbat 2-0 po is meris de domu cun d’unu gol in su primu tempus e unu in su de dus. Gol fatus de Diaw de rigori e de Bonfanti.
S’allenadori romanu fait cumentzai is matessis piciocus chi iat bintu cun sa Spal sa cida passada, cun feti Luvumbo a su postu de Falco po ddu fairi giogai a su costau de Lapadula e Rog chi giogat a su postu de Nandez, chi no istat beni. Rog si dda giogat de trecuartista, andendu a segai is ancas a su regista de su Modena Gerli. O cicat de ddu fairi. Poita funt is modenesus a cumandai sa partida, finas chi po biri unu primu tiru in porta tocat a aspetai finas a su 21’, cun d’unu corpu de conca de Falcinelli acabau in pissu de sa traversa casteddaia. Unu minutu a pustis Makoumbou non si nd’acatat de Falcinelli chi teniat a is palas e cichendu de ci fuliai sa bocia foras area cun d’una punta de pei ndi boddit s’atacanti modenesu. S’arbitru non tenit peruna duda e fischiat su rigori po su Modena. Po Diaw est unu giogu a fairi gol.
Su Casteddu non fait meda e sa reatzioni s’est amostada feti in d’una mischia in s’area de su Modena: a dogna modu pagu cosa. A s’acabbu de su primu tempus s’arbitru, faddendu chena atrus fueddus, ci stupat a Rog de su campu.
Dolumannu e arriolu po totu is tifosus. A su cumentzu de su tempus de dus Ranieri fait imbucai Lella e su giogadori comporau de pagu Prelec, foras andant Capradossi cun Luvumbo. Sa difesa si ponit cun cuatru giogadoris, duncas, ma est su Modena chi amostat prus gana de binciri e Radunovic cicat de fairi su doveri su, massimamenti cun is tirus de Giovannini e Cittadini. Su Casteddu non ce dda fait a ponni in pensamentu sa difesa de su Modena e a seti minutus de s’acabbu pigat un’atru gol cun Bonfanti.
Màuru Mura
Lunis, su ses de friargiu de su 2023
Foto: https://www.vivaticket.com/it/ticket/serie-bkt-22-23-modena-modena-fc-cagliari/202098
