Su Casteddu torrat in Sardigna cun dd’unu puntu chi permitit de ponni a un’ala una gida dificili, intru de giogadoris chi si funt strupiaus e a pustis sa partida perdia cun s’Inter. Po Fàbiu Pisacane, s’1-1 in Friuli contras de s’Udinese est unu paregiu chi balit, massimamenti dapoi de suferentzia manna: “A is puntus s’Udinese minesciat calencuna cosa de prus”, narat s’allenadori de su Casteddu. “In sa parti de unu, finas chi eus poderau beni su campu, eus cuncediu calencuna cosa poita s’Udinese est una scuadra chi scit giogai. Is friulanus, prus che a totu de sa metadi campu in sus est una fortza, dispragit ca in sa parti de dus dd’eus fatu pigai coragiu cun dd’unu sbagliu in su gol insoru e cussus dus arregalus chi dd’eus fatu”.
Non totu est andau beni in is noranta minutus: “Eus faddiu su cumandu de sa partida. Pensu a candu cichiaus sa profondidadi e bastaiat a si ponni beni in campu po torrai a partiri”, narat Pisacane. De bonu, invecias, c’est su primu gol de Borrelli. “Unu piciocu chi scit giogai po sa scuadra, seus cuntentus meda po issu chi at fatu su primu gol in Serie A. Ddu eus sceberau poita tenit carateristicas chi a nou giuant meda. Oi teniat una chistioni de importu de poderai, poita si chistionaiat meda de Belotti e de comenti s’est strupiau. Immoi nosi gosaus su piciocu e nos aspetaus chi in su benidori possat fairi atrus gol”.
Pisacane, a su cumentzu, iat sceberau de erriscai Mina, chi lompiat de unu strobu a su genugu, ma su colombianu at lassau a pustis binti minutus. “Non fut a su 100% et est bessiu po unu strobu a sa camba. Sa responsabilidadi est sa mia poita in s’arti mia depu sempiri sceberai”. E no est mancu imbucau Luperto, finas issu frimau de un’infortuniu: “In su noti no est stetiu beni, non fut a su 100% e apu prefergiu de ddu lassai foras”. A giogai, invecias, Di Pardo chi at pigau su postu po totu sa parti de dus de Felici ca fut ammoniu: “Unu cicat de premiai finas su trabbagliu intru de sa cida, issu ddu minesciat”.
Màuru Mura
