Is orrestus bogaus a pigliu in su campusantu de Montelupo funt de Franciscu Vinci, s’omini prus de importu de cussa chi est stetia lamada “pista sarda” po is bocidorgius de su “Mostro de Firentze”. A dogna manera sa “pista sarda” no at portau a nudda po is incurpaus. Est su Dna a scoviai totu, comenti narat su criminologu e indagadori Davidi Cannella, procuradori speciali de sa familia Vinci chi iat pediu s’esamini.
Immoi “cussu Dna fait parti de su materiali indagadori po s’assassinu de is sposus – narat su matessi Cannella –. Est probabili chi sa Procura ddu bogliat ponni cunfroma a atrus orrogus de Dna, pigaus in is orus de is logus aunia su “Mostro de Firentze” bocìat.
a ndi bogai su corpus de Franciscu Vinci ddu iant cumandau, in su mesi de cabudanni passau is pubricus ministerus Ornella Galeotti e Beatrici Giunti, po acrariri ca su corpus chi s’agatat in su tumbinu est de su matessi Vinci, agatau mortu e abrugiau in su mesi de austu de su 1993 in su sartu acanta de Pisa.
Is orrestus de Vinci ddus ant studiaus in s’Istitutu de meigina po sa lei de Firentze. Po sa Procura de sa capitali toscana si ddue agataiant su dotori po sa lei Martina Focardi e su genetista Ugo Ricci, in su mentris chi cussus de sa familia Vinci, lamaus de sa fiuda Vitalia Velis, funt su genetista Eugeniu D’Orio e su dotori po sa lei Ardu Allegrini.
Est de arregodai ca Franciscu Vinci, paris a su fradi Sarbadori, fut unu de cussus chi sa giustissia castiaiat de prus acanta po cantu pertocat sa morti de unu de cussas postas in is palas de su “Mostro de Firentze”. Difatis Stevini Mele, pobiddu de Brabara Locci, bocìa cun Antoni Lo Bianco in su 1968 in su sartu de Lastra a Signa, iat inderetura incurpau is dus fradis, chi si dda faiant cun sa pobidda. Ma a s’acabbu de totu su matessi Mele ddu ant cundennau po cussa morti e finas po airi disciamiau is Vinci.
Màuru Mura
Mercuris, su dixiannoi de martzu de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=cmnnaTuLNpQ
