“Po nosu no est de certu facili a fueddai oi, seus galu suferentis meda, e non pagu, po sa morti de su capu nostu chi at abarrai po sempiri su capu nostu” Ddu at nau su cooridinadori de Fortza Italia Antoni Tajani in un’atobiu cun is giornalistas paris a is capus trumas Pàulu Barelli e Licia Ronzulli, chistionendu in pissu de su tempus benienti de su partidu a pustis sa morti de Sirviu Berlusconi, chi Fortza Italia nde ddu iat pesau de nudda trint’annus a immoi.
Tajani at finas fueddau de cussu chi podit sussediri, a intru de su partidu, cun is nominis de Marina Berlusconi, sa figlia prus manna de Sirviu, e de sa deputada e cumpangia Marta Fascina. “Marina Berlusconi m’at torrau a nai, dognunu abarrendu in is suas, su beni mannu, sa stima e s’acostiamentu de totu sa familia sua po Fortza Italia”, e invecias po sa Fascina “non c’est perunu bisongiu de ddi donai spatzius formalis”.
At a pustis chistionau de su benienti prus acanta “Po rispetai s’articulu dixiannoi de su Statutu, chi, a dolumannu, narat eita tocat a fairi in su casu chi su presidenti non ci podit essiri, giobia chi benit si at a atobiai su Comitau de presidentzia chi at a decidiri de fairi atobiai su Consigliu natzionali de su partidu”, at cicau de fairi cumprendiri Tajani. Aciungendu finas: “Su Consigliu natzionali at essi lamau a fairi unu presidenti nou de su partidu in custu tempus, chi at a depiri chiai su movimentu politigu finas a su Congressu natzionali chi eus a fairi. At essi su presidenti nou a decidiri, comenti narat su Statutu, a pustis airi fueddau su Consigliu natzionali. Una cosa est seguru eus a sighiri a sa litara totu cussu chi narat su Statutu”.
“Su nomini de Berlusconi – at acabau de nai Antoni Tajani – at a essiri sempiri in su simbulu nostu, poita custa est criadura sua. Ddu torru a nai, custu est e at a essiri sempiri su partidu de Sirviu Berlusconi”.
Màuru Mura
Lunis, su 19 de làmpadas de su 2023
Foto: https://www.avvenire.it/attualita/pagine/tajani-fi
