Funt duas is scuadras sardas, su Terranoa e sa Torres, chi si funt gioghendu su campionau de serie C. Ddu funt fendu in su gironi B aunia sa Reggiana at fatu sa bogi grussa e s’agatat in conca de sa classifica. Sa Torres e s’Olbia funt una a su costau de s’atra cun trintacuatru puntus e s’agatant a tres puntus de sa zona caglienti. Eris ant giogau sa giorronada de trintadus.
Su Terranoa poderat cussu chi iat nau a pustis sa partida perdia in domu, dominigu passau, contras de s’Imolese e si ndi torrat a pesai in su campu de su San Donato Tavarnelle andendu a binciri po 2-0 cun is gol de La Rosa e Dessena. Is piciocus de Occhiuzzi, s’allenadori de su Terranoa, ant giogau beni de averas, in su stadiu “Brilli Peri” de Montevarchi e sa partida est stetia decidi giai in su primu tempus: a pustis binti minutus at fatu gol La Rosa, chi eris at torrau a biri su campu de su cumentzu e teniat fintzas sa sa fascia de capitanu in su brassu; a sa mesora de sa partida Dessena at fatu un’atru gol. Su matessi Dessena iat giai fatu gol dominigu passau, duncas tocat a nai ca est sa carta in prus de custu tempus po sa scuadra gadduresa. A s’acabu de sa partida is terranoesus ant possiu festai e immoi aspetant, chena timiri, sa partida de dominigu chi benit cun sa Carrarese, chi s’agatat in sa truma de a innanti de sa classifica.
Sa Torres at donau totu, ma non ce dd’at fata a fairi mancu unu gol, in sa partida de eris cun su Rimini, in su “Vanni Sanna” de Tatari, acabada po 0-0. Unu puntu chi permitit a is tataresus po abarrai foras de sa zona caglienti. A is tifosus de sa Torres sa gana e sa barra de is giogadoris est pragia, difatis a s’acabu ant batiu is manus.
Su caminu po ambas is scuadras est sempiri in bessida, ma tocat a tenni fidi, ca in dogna partida is piciocus de Occhiuzzi e Sottili, allenadori de sa Torres, ce dda ponint totu de averas.
Màuru Mura
Mercuris, su cuindixi de martzu de su 2023
Foto: https://www.calciomagazine.net/classifica-serie-c-girone-b-120424.html
