A pustis su paregiu in domu cun su Verona de sa dì de su Lunis de s’Angilu, dogna tifosu de su Casteddu fut arriolau ca teniat, de sighiu, tres partidas chi pariant dificilis medas: Atalanta, Inter e Juventus. Su prus chi teniat spera si iat essi acuntentau de dus puntus, ma cussus chi dda biant niedda si creiat ca mancu unu puntu iat essi portau in su scusorgiu. Invecias, spantosamenti e cun miniscimentus mannus, su Casteddu de Ranieri, de puntus nd’at postu a caiddu cincu, lompius in segus a sa vitoria cun s’Atalanta e a is paregius cun s’Inter e eriseru a merì, in sa Unipol Domus, cun sa Juventus. Chini ddu iat airi nau? Naraus sa beridadi, in pagus. Est a nai puru ca is puntus podiant essiri seti, chi non fessit stetiu de Dossena, su difensori casteddaiu, chi at permitiu a sa Juventus de paregiai una partida chi pariat perdia a tres minutus de s’acabbu. Ma andat beni finas aici. Ant bisau is tifosus sardus, ca a essiri in pissu de dus gol a pustis una parti de unu giogada spantosamenti at allirgau su coru a dognunu. Non scieus chi at a torrai a sussediri, ma a s’agatai a giogai cun dd’una de is scuadras prus famadas e a tenni dus rigoris in pagu minutus no est cosa de dogna dì. Dapoi finas unu gol de Vlahovic annullau e in segus finas unu corpu de cuidu de Mina, in s’area de rigori, chi at lassau prus de una duda. Insoma, pariat ca a is piciocus de Ranieri fut andendu totu aici beni ca si podiat sighiri a bisai. Funt lompius is gol de sa Juventus, is prus sabius ddu sciant ca non podiat acabbai aici, tropu gratzia! Ma a is tifosus abarrat prus che su marigosu in buca su airi bidu una scuadra chi at gherrau in pissu de dogna bocia, cun gana e spera. E custa gana e custa spera fait cresciri sa pensada ca su Casteddu non di podit calai in Serie B. Ddu est amostendu in donnia, chena farta. E su miniscimentu prus mannu eest po un’omini chi a sa Sardigna de su fubalu at donau meda: Claudiu Ranieri!
Màuru Mura
Sabudu, su binti de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.youtube.com/watch?v=xbgJMMmh69c
