“Cussu de oi fut un’allenamentu chi est andau beni meda”. Funt custus ins fueddus de s’alleandori de su Casteddu Fàbiu Pisacane, a pustis sa partida, intru de amigus, contras de sa scuadra tedesaca de s’Hannover. Partida perdia po 2-0 in su Heinz von Heiden Arena. Una partida perdia nascia in dd’unu mericeddu aunia su Casteddu at mudau meda cunfroma a is atras duas partidas giai giogadas. Est a nai finas ca is piciocus de Pisacane funt stracus po totu su trabbagliu fatu in is urtimas duas cidas. “Eus trabbagliau meda, comenti si depit sempiri fairi in custu tempus de s’annu. Sa partida, immoi, ti fait trabbagliai e cumprendiri cosas medas de sa scuadra. Est finas craru ca a giogai bolit nai ca non podis ponni in peis atras cosas chi si faint, invecias, in s’allenamentu”.
Scuadra mudada, duncas, cunfroma a sa partida de mercuris cun is turcus de su Galatasaray: “A pustis tres dis de sa partida cun su Galatasaray est normali ca seus stracus, eus cicau de ghiai is carrigus de trabbagliu”, narat sempiri s’allenadori campanu. Chi at depiu finas castiai is cartellinus grogus chi funt lompius po is giogadoris: seti intru de is otu in totu e giai cincu in sa parti de unu de sa partida: “Mercuris passau c’iat una truma de giogadoris chi iat giogau po setanta minutus, oi sa filera de cartellinus grogus, in sa parti de unu, nos at amostau ca depiaus arrangiai calencuna cosa”.
Su Casteddu torrat in Sardigna cun dd’una vitoria, cun s’Ospitaletto e duas partidas perdias, cun su Galatasaray e s’Hannover. Ma in su mesi de orgiolas is arresurtaus non funt mancu de castiai: “Scuadras pagas ant aprontau partidas aici tostadas. Comenti andant a acabbai non tocat a ddu fairi, poita tocat a donai atentzioni manna a comenti si lompit a is partidas e, a su matessi tempus, comenti si podit galu migliorai su giogu. Est craru ca serbit tempus po s’imbestiri, finas chi a nosu iat a pragiri a fairi totu beni e inderetura”.
Màuru Mura
Lunis su bintotu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.youtube.com/watch?v=59mT3o-LNFE
