“Non boleus sa guerra contras de s’Europa, ma chi issus bolint nosu seus prontus”.
Ddu at nau Vladimir Putin intru de un’atobiu cun is giornalistas, pagu tempus a innantis de s’atobiu cun somini mandau de Trump, in Mosca, Steve Witkoff.
“S’Europa – at nau su presidenti de sa Russia – est cichendu de frimai s’aministratzioni de is Stadus Unidus, ghiada de Donald Trump de lompiri a sa pagi in Ucraina e totu is intentzionis de is europeus portant a custu arresurtaus, in su mentris chi in Kiev parint biviri in dd’unu atru pianeta”.
E galu: “Sa Russia non tenit peruna idea de cumbatiri cun s’Europa, ma chi s’Europa at a cumentzai, eus as essi prontus”, at aciuntu Putin, po apustis torrai a nai. “Non boleus imbucai in guerra cun s’Europa, ddu apu nau giai centu e prus bortas. Ma chi s’Europa si movit at agatai un natzioni pronta”.
Putin at, in prus, amelessau s’Ucraina massimamenti po is atacus a is petrolieras russas, e atrs navis puru, in su Mari Nieddu: “Chi sighint depint donai crobba manna a s’arrespusta de sa Russia”.
In s’atra parti de su mundu, intru de un’atobiu, su presidenti de is Stadus Unidus Donald Trump at chistionau de sa situatzioni de su mundu umperendu su fueddu “disastru” e at nau a craras litaras ca at giai risorbiu otu guerras.
“Custa iat essi sa de noi, e sa genti nostra est in Russia in custas oras po biri chi si podit fairi calencuna cosa po lompiri a sa pagi. No est una situatzioni facili, lassaimiddu nai, est unu disacattu mannu de averas”, iat airi nau Donald Trump, po cantu ndi scrit su The Guardian.
Su presidenti americanu at in prus aciuntu ca, chi fut stestiu issu a sa ghia de is Stadus Unidus in s’ora de candu est cumentzada sa guerra, “No iat essi mai sussediu, mancu po sonnu”.
Is fueddus de Trump lompint in dd’una ora de problemas mannus in su mundu, in su mentris chi is Stadus Unidus cicant de castiai beni comenti si movint is atrus.
Màuru Mura
