“Allirghia manna a intru de mei. Calafiori est stetiu bravu de averas a mi donai cussa bocia e deu apu tirau chena mancu ci pensai”. Aici Matia Zaccagni fueddat de s’emotzioni po airi fatu su gol, a s’urtimu sulidu de partida, chi at permitiu a s’Italia de paregiai contras de sa Croatzia. Cun su gol de Zaccagni s’Italia lompit a su segundu postu de su Gironi B, a is palas de sa Spagna, chi cun noi puntus bincit su matessi Gironi, e immoi si dd’at a giogai, in partida sica, cun sa Svitzera.

S’allirghia de Zaccagni est finas cussa de totu is cumpangius. “Soi cuntentu ca eus passau su gironi, poita fut sa sola cosa chi contaiat. Ma finas comenti eus giogau no eus fatu mali. In calencunu tretu de partida ddu eus fatu beni meda e de custu tocat a torrai a partiri”, at nau, a pustis sa partida, Calafiori chi a pustis s’autogol cun sa Spagna, eris at donau sa bocia decisiva po su gol chi balit sa cualificatzioni.

Finas Spalletti at chistionau et est partu nervosu meda a is preguntas de is giornalistas, massimamenti cussu de Sky: “Prudentzia? Ma cali prudentiza seus a suta sa normalidadi”, at nau s’allenadori toscanu arrespundendu. “In sa parti de unu de sa partida eus perdiu bocias medas chi non si podint perdiri. Eita c’intrat sa prudentzia? Oi seus stetius, massimamenti bregungiosus. In segus intendu nai ca depeus giogai a tres ominis o a cautru in difesa, ma nosu giogaus in ambas is maneras. Non c’intrat nudda comenti nosi poneus in campu. Is giogadoris nostus tenint calidadi bona, ma in calencunu momentu si perdint in dd’una tassa de abba. Teneus de seguru possibilidadis prus mannas cunfroma a cussu amostau custu merì. Serbit prus coragiu”.

E immoi sa Svitzera chi cun is Asulus italianus si dd’ant a giogai sabudu in Berlino a is ses de merì, aunia non si podit prus faddiri: o aintru o a foras!

 

 

 

 

Màuru Mura

 

 

 

Martis, su binticincu de làmpadas de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ilromanista.eu/news/nazionale/152145/live-croazia-italia-le-formazioni-ufficiali