Sonumancu centu e dus personis funt mortas po su calori mannu, chi de sabudu passau at imboddiau sa Spagna. Est cussu chi narat Su “Sistema di Monitoraggio” de sa mortalidadi cuotidiana po dogna arregioni (MoMo) de sa Natzioni, in su mentris chi sighit s’agitoriu po su calori chi est allupendu giai doxi intru de dixiaseti regionis. Duncas calori forti e finas abba chi calat a istrossas, po cussu chi narat s’Agentzia metereologica statali Amet in sa pagina de su giassu.
In is ses mesis, de su cumentzu de s’annu, sa filera MoMo at registrau sonumancu 380 mortis po mori de su calori forti meda.
In provincias de s’Andalusia, comenti in Cordoba, Siviglia e Jaen, in sa parti bascia de sa penisola iberica, aunia s’agitoriu est de colori de arangiu – po erriscu de importu mannu – is temperaduras giumpant is corantadus gradus. In su mentris su calori, chi est spantosu po su tempus, sighit a fairri morri sa genti, in cuatru in is urtimas duas dis.
Amet, s’agentzia metereologica spagnola, fait sciri ca ant essi intru de is 38 e 39 gradus in sa regioni de pissu de Castiglia e Leon e prus de coranta in cussa de mesania de Castiglia La Mancia e in sa Comunidadi de Madrid.
Su calori mannu, chi comenti eus nau est de spantu po su cumentzu de su mesi de triulas e de s’acabbu de làmpadas, cumentzada sabudu passau, sighit in is comunidadis autonoma de Estremadura, Cantarbia, La Rioja, Asturie et Galitzia, in sa parti de s mesania de pissu de sa Spagna.
No andat meglius in sa Grecia, aunia, in prus de su calori, funt is fogus a arriolai, in manera funduda s’isula de Creta. De eris, difatis, s’est cichendu de ndi smorri su fogu in Lasithi, chi est in sa parti orientali de s’isula. Funt giai in 230 is viglis de su fogu chi si ddue agatant.
Turistas medas, a centinaias, ant dromiu, po custa arregioni, in su campu sportivu, imboddiau, de Iarapetra.
Màuru Mura
Giobia, su tres de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.meteogiornale.it/2021/08/cronaca-meteo/caldo-estremo-spagna-record-europe
