“Mi soi postu, bias medas, a intru de is bestiris de su babbu e de sa mama de Filipu Turetta, finas poita comenti de naturali soi sempiri unu ratzionali. Possu nai beni ca ddus cumprendu meda, ddus ia imbrassai chena perunu problema. Non mi possu permitiri de donai giuditzius, funt bivendu una vida meda prus legia de sa mia. Deu apa cicai de torrai a erriri, e calencuna bia ci soi giai arrennesiu. E, dapoi, tengiu amigus e figlius spantosus, chi po mimi funt prendas de oru. Su babbu e sa mama de Filipu Turetta, invecias, ant a tenni prus problemas medas, poita ant essi sempiri su babbu e sa mama de unu piciocu chi at bociu. Ddus cumprendu, chena farta”. Ddu at nau Ginu Cecchettin, de Roma, aunia s’agatat po sa manifestada “Obiettivo %” in s’universidadi La Sapienza, chistionendu de sa familia de su piciocu incurpau de airi bociu sa figlia Giulia. Giulia, ddu arregodaus, fut una picioca de bintidus annus chi est stetia bocia in su mesi de Sant’Andria de ocannu passau. Fut studiendu po diventai ingegnera biomedica, in s’universidadi de Padova, e si depiat laureai su seigi, sempiri de Sant’Andria de su matess’annu in su cali est morta.
Ginu Cecchettin candu est lompiu in s’aposentu de s’universidadi romana at ascurtau, cun is ogus infustus, sa batidura de manus longa de averas de is discientis. “Custa batidura de manus est po Giulia, sa spera mia est custa”, at nau a pustis. Aciungendu in segus: “Imbuchendu innoi non ce dd’apu fata a non prangiri, poita fut una discienti universitaria comenti de bosatrus. Fut una picioca spantosa. Apu decidiu de scriri unu libru (‘Cara Giulia?) poita aici podiat abarrai unu arregodu de Giulia, chi nd’at sempiri boddiu su significu de s’amori. Agiudaiat is atrus, chinechisiat tenessit abbisongiu: de sa familia a is amigus e finas a is strangius. Gut cuta figlia mia e su libru est poita Giulia abarrit”.
Màuru Mura
Giobia, su seti de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://notizie.virgilio.it/sondaggio-uscito-cara-giulia-il-libro-di-gino-cecchettin-sulla-morte-della-figlia-cosa-ne-pensate-1609441
