Pyongyang at amostau is imaginis de su capu Kim Jong-un ingenugau e prangendu indenanti a su baulu, imboddiau de sa bandela nordcoreana, aunia si dde agataiat su corpus de unu sordau mortu in Russia.
Is televisionis statalis ant fina amostau is imaginis de Kim chi narat ca giai a is pianus militaris po sa citadi russa de Kursk, in cussu chi pargiat essiri una prova po giustificai
s’ammanniamentu de is trumas, pensau de Pyongyang, a intru de s’acabbu de s’annu. Po cussu chi narat sa Kctv e su Rodong Sinmum, Kim Jong-un, dominigu passau s’agataiat in dd’unu spetaculu po arregodai, s’anniversariu de unu, s’alliantzia intru de sa Corea de su Nord cun sa Russia.
Custu est sussediu dominigu po mori ca una delegatzioni de Mosca, ghiada de sa ministra de sa Cultura Olga Lyubimova. Kim fut acumpangiau de su figliu, chi est ancora piciocheddu, Ju-ae e de atrus funtzionarius de sa matessi Corea e de sa Russia.
Intru de scenas diversas, Kim s’amostat cumoviu indenanti de su baulu imboddiau cun sa bandela natzionali, chi s’ingenugat e ponit ambas is manus in pissu de su baulu etotu. Po omagiai su sordau, si ddue agataiat finas sa sorri de Kim, est a nai Kim Yo-jong chi ghiat su dipartimentu de sa Propaganda de su partidu de is Trabbagliadoris.
Ma, castiendu beni is imaginis, si ddue amostant, prus o mancu, cuatru o cincu baulus chi s’atumbant cun is novas, po is calis funt prus de 4.700 is sordaus coreanus mortus in Kursk.
Is media ant finas amostau, po sa prima bia, unu filmau de Kim chi firmat unu “Pianu operativu de liberatzioni de Kursk”. Po cussu chi si narat in su video, Kim iat airi aprovau su pianu in tres ocasionis: su 22 de Santu Aine, su 12 de mesi de idas e su 22 de su matessi mesi.
Su filmau amostau at bofiu ponni in is pumus artus su agiude de Kim, non feti cun is trumas, ma finas in su campu de guerra.
Màuru Mura
Martis, su primu de triulas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.open.online/2025/06/30/corea-nord-russia-kim-jong-un-funerali-soldati-lacrime-ucraina/
