Sa Russia at atacau s’Ucraina. Candu in Mosca furint cuasi is ses de mengianu e furint fendu in s’Onu un’atobiu de su Consigliu de sa Seguresa, Vladimir Putin at annuntziau, in sa televisioni, su cumentzu de s’atzioni militari.

Su presidenti russu at pediu a s’esercitu de Kiev de “abasciai is armas e torrai a domu”, nenduru puru ca s’atacu serbit “po agiudai su Donbass”. “Sa pensada nosta – at nau Putin – no est s’ocupatizoni de is terras ucrainas, ma nde ddi boleus tirai is armas, non podeus acetai chi sa Nato umperit cussus logus”.

Duncas no est una guerra, ma feti un’operatzioni militari, po Putin. Avertit is ocidentalis: “Chinechisiat si pongiat in mesu scipat ca eus a arrespundiri comenti mai s’est amostau. Seus prontus a totu, sa spera est chi m’ascurtint e ci pensint milli bortas”.

A pustis is fueddus de Putin si funt intendius is sonus de guerra in is citadis ucrainas. Non feti cussas de lacanas, ma finas Kiev at cumentzau a intendiri bombas e fosilis. Bombas finas in Odessa, Kharvik e Mariupol. E sonant is sirenas finas in Leopoli, in s’Ucraina ocidentali, aunia funt lompius diplomaticus meda candu ant bidu sa mala parada. In sa direta de sa Cnn de Kiev si funt intendias is bombas e su giornalista at inderetera postu su giubotu contras is ballas. Po sa televisioni americana funt giai medas is mortus.

“S’Ucraina no abarrat cun is manus in manus e a s’acabu at a binciri. Su mundu podit e depit frimai Putin: est imoi chi si depit fairi”, funt is primus fueddus de su ministru de is Esterus ucrainu Kuleba. Su presidenti Zelensky avertiti s citadinus de abarrai trancuillus e de abarai in domu, ca sa Russia, po imoi bolit atacai feti is zonas militaris. “De oi iat podir essiri su cumentzu de una guerra manna in Europa”, funt is fueddus de su presidenti de s’Ucraina.

S’esercitu russu, a pustis is bombas, est intrau in Ucraina non feti de is lacanas suas ma finas de sa Bielorussia e de sa Crimea.

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.today.it/mondo/guerra-russia-ucraina-video-missili-kiev-luhansk-kharkiv-ultime-notizie.html