Unu narat una cosa e s’ateru cuasi s’imbessi. Est cussu chi est beniu a foras de su cara a cara intru de sa “leader” de Fradis d’Italia Giorgia Meloni e su segretariu Erricu Letta de su Partidu Democratigu. Sa cuntierra in sa redatzioni de su Corriere della Sera.
Non podiat mancai intru de totu is chistionis cussa in pissu de su PNRR. “Chi si possat fairi in atru modu est beru, at nau sa Meloni, arregodendu “ca su Portogallo ddu at pediu e Gentiloni at nau ca est de interessu mannu. E nosu non ddu podeus fairi? Tocat umperai de prus s’energia chi teneus”, at aciuntu de fatu sa Meloni.
De atru parrer Erricu Letta: “Su Pnrr no andat tocau poita chi si fait est comenti chi a chini pedeus cussu dinari erribat su messagiu ca s’Italia no est afidabili”. Su segretariu de is dem at aciuntu ca “A intru a su Pnnr s’agatat giai totu cussu chi serbit po ddu mudai po is necessidadis chi boleus nosu”.
A pressai su cadu de Fdi, in is urtimas oras,, est intervenniu finas Mateu Salvini, chi de sa Meloni est alleau: “S’arriolu mannu de is italianus in custu tempus funt is bulletas”, at nau su capu de sa Lega de Firenze, “Si depint ponnni in sa mesa, inderetura, trinta milionis de eurus po ddus agiudai a ddas pagai, chena perdiri tempus. Chini narat ca nou bolit nai ca non connnoscit beni s’Italia. Cun Giorgia eus a binciri is eletzionis, ma non cumprendu poita in custa chistioni non pighit una positzioni chena abarrai de un’ala a s’atra. Serbit su dinari oi, comenti si fait a non ddu cumprendiri? Tocat a ponni a depidu trinta milionis, comenti giai eus fatu cun sa pesta de su Covid, e de fatu eus a benni a biri ita fait s’Europa in is mesis chi ant a lompiri. Ma, torru a nai, tocat a ddu fairi inderetura”. Fueddus sabius cussus de Letta o cussus de Salvini? Su 25 de cabidanni s’acostiat, ant essi is italianus a decidiri.
Màuru Mura
Su 13 de cabidanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.rainews.it/maratona/2022/09/meloni-di-maio-letta-berlusconi-salvini–a25b387f-0ed2-48f5-a157-e43878298920.html
